Azərbaycanın ictimai-siyasi gündəminin gərginləşdiyi bir vaxtda tanınmış alimdən sərt bəyanat gəlib.
KONKRET.az xəbər verir ki, Elmlər doktoru, professor Vaqif Abdullayev sosial şəbəkə hesabında ölkədə baş verən ictimai-siyasi proseslərlə bağlı sərt mövqeyini ifadə edib.
Professor bildirib ki, Azərbaycan hazırda dövlətçiliyə qarşı yönəlmiş təhlükəli və həssas mərhələdən keçir və bu mərhələdə heç kəs biganə qalmamalıdır. Onun sözlərinə görə, vaxtilə hakimiyyətin ən yüksək postlarında təmsil olunan, hazırda isə dağıdıcı müxalifət düşərgəsi ilə birgə hərəkət edən şəxslərin ifşası hər kəsi açıq mövqe nümayiş etdirməyə vadar edir.
Vaqif Abdullayev vurğulayıb ki, ictimai-siyasi baxışından, partiya mənsubiyyətindən və sosial statusundan asılı olmayaraq, Azərbaycan dövlətinə və Prezident İlham Əliyevə sadiq olan hər kəs mövqeyini ortaya qoymalıdır. O, qeyd edib ki, özünün uzunillik elmi, ictimai və siyasi fəaliyyəti Ümummilli lider Heydər Əliyevin siyasi kursuna və Prezident İlham Əliyevə bağlı olub:
“Hələ 1999-cu ildə yazdığım “O Böyük Siyasətə hazırdır” kitabımda da Cənab İlham Əliyev haqqında mövqeyimi açıq şəkildə ifadə etmişəm. Bu gün də bir ziyalı kimi susmağı özümə bağışlaya bilməzdim”.
Paylaşımda Ramiz Mehdiyev və Abbas Abbasovun adlarını çəkən professor, onların dövlətə qarşı fəaliyyətlərdə yer aldıqlarını bildirib. Abdullayev qeyd edib ki, 2022-ci ildə Ramiz Mehdiyevin fəaliyyəti ilə bağlı kəskin mövqeyini açıqlayıb və onun AXCP-Müsavat hakimiyyəti dövründə Milli Elmlər Akademiyasına vurduğu zərərlərə diqqət çəkib.
Professorun sözlərinə görə, son proseslər Ramiz Mehdiyevin Əli Kərimli, Gültəkin Hacıbəyli və digər müxalifət nümayəndələri ilə birgə dövlət əleyhinə fəaliyyətdə iştirak etdiyini üzə çıxarıb. O, Mehdiyevin ətrafında vaxtilə yüksək dövlət vəzifələrində çalışmış və ali dövlət mükafatları almış şəxslərin də yer aldığını qeyd edib.
Vaqif Abdullayev Abbas Abbasovla bağlı da sərt fikirlər səsləndirərək, onun dövlətin əsaslarını sarsıtmağa yönəlmiş fəaliyyətlərdə iştirak etdiyini bildirib. Professor qeyd edib ki, Prezident İlham Əliyev bu şəxsləri təqaüdə göndərərkən dövlətin ali mükafatları ilə təltif etməklə yüksək nəciblik nümayiş etdirib.
Paylaşımda Abdullayev vurğulayıb ki, bütün bu cəhdlərə baxmayaraq, Azərbaycan dövlətinin möhkəm dayaqları var və xalq–Prezident İlham Əliyev birliyi heç bir qüvvənin planlarının reallaşmasına imkan verməyəcək:
“İlham Əliyevin Dəmir Yumruğu təkcə separatçılara qarşı deyil, milli satqınların da başı üzərindədir”.
Sonda professor gələcək naminə dövlətə qarşı çıxan qüvvələrə və onlarla əlbir olan xarici mərkəzlərə qarşı birlik nümayiş etdirməyin vacibliyini qeyd edib.
