Son günlər “Temu” platforması üzərindən sifariş edilən bağlamalarla bağlı sosial şəbəkələrdə çoxsaylı şikayətlər yayılıb.
Vətəndaşların sözlərinə görə, məhsulların bir hissəsi itir, bəzi bağlamalar isə açılmış və yenidən qablaşdırılmış vəziyyətdə çatdırılır.
Bakupost.az xəbər verir ki, şikayətçilər məsuliyyətin kargo şirkətlərinin üzərinə düşdüyünü bildirirlər. Onların sözlərinə görə, “Limak” şirkəti məsələ ilə bağlı “biz yalnız çatdırırıq, məsuliyyət bizdə deyil, Temu ilə əlaqə saxlayın” cavabını verir.
Digər tərəfdən, Temu sifarişlərin tam şəkildə göndərildiyini bildirir və məsuliyyətin çatdırılma zəncirinə aid olduğunu qeyd edir.
Bəzi vətəndaşlar isə bu halların “Temu”nun fəaliyyətinin məhdudlaşdırılması və ya dayandırılması məqsədilə qəsdən edildiyini iddia edirlər.
Qeyd edək ki, son dövrlərdə “Temu” vasitəsilə ölkəyə daxil olan bağlamaların sayında kəskin artım müşahidə olunur və bu da logistika və nəzarət proseslərində əlavə çətinliklər yaradır.
Məsələ ilə bağlı Dövlət Gömrük komitəsinə sorğu ünvanladıq. Qurumdan Bakupost.az -a bildirildi ki, malların gömrük orqanları tərəfindən açılması ilə bağlı iddia həqiqəti əks etdirmir:
“Gömrük orqanları mal və nəqliyyat vasitələrinə xüsusi rentgen qurğuları vasitəsilə baxış keçirirlər.
Baxış zamanı hər hansı təhlükəli və ya şübhəli hal aşkar edildikdə, mallar gömrük əməkdaşları tərəfindən deyil, daşıyıcı şirkətin nümayəndəsinin iştirakı ilə açılaraq yoxlanılır. Yoxlama başa çatdıqdan sonra mallar daşıyıcı şirkətin nümayəndəsi tərəfindən yığılır və vətəndaşa təhvil verilir”.
Məsələ ilə bağlı Bakupost.az-a danışan Azad İstehlakçılar Birliyinin sədri Eyyub Hüseynov bildirir ki, Temu-dan daxil olan şikayətlərin çeşidi müxtəlifdir:
“İlk növbədə reklam olunan malların göndərilən mallara uyğun olmamasıdır. Məsələn, bizim ofisdə nümunələr var. Saat sifariş edilir, vətəndaşa tamamilə fərqli, saatla heç bir əlaqəsi olmayan məhsul göndərilir. Paltar asmaq üçün mandal sifariş edilir, lakin uzunluğu 1 santimetrdən az olan, oyuncaq kimi əşyalar göndərilib.
E. Hüseynov əlavə edir ki, birliyə malların çatdırılmaması ilə bağlı da şikayətlər daxil olur:
“Eyni zamanda malların sınıq şəkildə gəlib çıxması halları da yaşanır.
İstehlakçılar bilməlidirlər ki, “İstehlakçıların hüquqlarının müdafiəsi haqqında” qanuna və “Elektron ticarət haqqında” qanuna görə elektron formada alınan məhsullar 14 gün ərzində dəyişdirilə və qaytarıla bilər. Belə hallarla üzləşən vətəndaşlar 012 599 76 00 nömrəsi ilə Prezident yanında Antiinhisar və İstehlak Bazarına Nəzarət Dövlət Agentliyinə şikayət etməlidirlər”.
