Yanvarın 27-də Bundestaqın Xarici İşlər Komitəsinin sədri Armin Laşetin dəvəti ilə Azərbaycanın Almaniyadakı səfiri Nəsimi Ağayev və Ermənistanın Almaniyadakı səfiri Viktor Yengibaryan “Cənubi Qafqazda dönüş zamanı: Azərbaycan və Ermənistan arasında tarixi sülh, Almaniyanın rolu və Avropanın yeni Şərq əlaqəsi” mövzusunda keçirilən müzakirədə iştirak ediblər.
Gündəm24.az xəbər verir ki, bu barədə Ermənistan mətbuatı məlumat yayıb.
Məlumata görə, Ermənistan səfiri Viktor Yengibaryan çıxışında Almaniya hökumətinə, həmçinin əvvəllər Bundestaqın Almaniya-Cənubi Qafqaz Dostluq Qrupunun sədri olmuş Federal xarici işlər naziri Yohann Vadepulaya əvvəlki dövrdə göstərilən konstruktiv fəaliyyət və dəstəyə görə təşəkkür edib.
Tədbirdə onlarla ekspert, parlament üzvü və media nümayəndəsi iştirak edib. Müzakirə Münhen Maksimilian Universiteti və Axen Universitetinin Beynəlxalq Əməkdaşlıq, Texnoloji Diplomatiya və Kommunikasiya İnstitutu tərəfindən təşkil olunub.
