Prezident Ərdoğan və Misir prezidenti Sisi ikitərəfli danışıqlardan sonra keçirilən mətbuat konfransında çıxış ediblər. Ərdoğan “İrana xarici müdaxilənin region üçün risk olduğunu” bildirib, Sisi isə “bölgəmiz çox sürətlə böhranlara meylli olur” deyib.
Gündəm24.az xəbər verir ki, Prezident Rəcəb Tayyib Ərdoğan Misir Prezidenti Əbdülfəttah əs-Sisi ilə görüşüb və iki lider birgə mətbuat konfransı keçirib. Həmçinin, Türkiyə ilə Misir arasında ticarət həcmini 15 milyard dollara çatdırmaq məqsədilə bir sıra müqavilələr imzalanıb.
Sisi görüşdə bildirib ki, Türkiyənin Misirə yatırdığı investisiyalar çox vacibdir, bölgə isə böhranlara meyllidir və əməkdaşlıq zəruridir. Ərdoğan vurğulayıb ki, iki ölkənin baxışları ortaqdır və strateji əməkdaşlıq sayəsində münasibətlər bütün sahələrdə inkişaf edir.
Liderlər Qəzza, Fələstin, Liviya, Sudan, Afrika Buynuzu və İrana dair məsələləri müzakirə ediblər. Qəzzada humanitar böhrana diqqət çəkən Ərdoğan İsrailin hücumları nəticəsində viran qalan ərazilərin yenidən qurulmasına dəstək verəcəklərini bildirib.
İmzalanan müqavilələr arasında Hərbi Çərçivə Sazişi, Əczaçılıq və Tibbi Cihazların Tənzimlənməsi, Bitki Karantini və Baytarlıq Xidmətləri üzrə anlaşmalar, həmçinin Sosial Müdafiə, Gənclər və İdman sahələrində əməkdaşlıq sənədləri yer alıb.
Sədaqət Həsənova
