Rusiya Müdafiə Nazirliyi dünən gecə Rusiyanın müxtəlif bölgələrində 82 Ukrayna hərbi dronu məhv etdiyini bildirib.
Gündəm24.az-ın TASS-a istinadən yaydığı məlumata görə, Rusiya Müdafiə Nazirliyi gecə saatlarında genişmiqyaslı PUA hücumunun dəf edildiyini açıqlayıb. Məlumatda bildirilir ki, Moskva vaxtı ilə 23:00-dan səhər 07:00-dək növbətçi hava hücumundan müdafiə qüvvələri ölkənin müxtəlif bölgələri üzərində Ukraynaya məxsus onlarla hərbi pilotsuz uçuş aparatını zərərsizləşdirib. Ən intensiv hava hücumlarının Volqoqrad istiqamətində qeydə alındığı, həmçinin Bryansk, Rostov, Saratov, Orel, Tver və Kursk vilayətləri üzərində də çoxsaylı dronların vurulduğu bildirilib.
Bundan əlavə, Həştərxan, Belqorod, Voronej, Kaluqa, Lipetsk və Smolensk vilayətlərinin hər birində ən azı bir PUA-nın məhv edildiyi qeyd olunub. Nazirlik vurğulayıb ki, Rusiya ordusu Ukrayna Silahlı Qüvvələrinin hücumlarına cavab olaraq qarşı tərəfin hərbi obyektlərinə və hərbi-sənaye infrastrukturuna yüksək dəqiqlikli silahlar və pilotsuz uçuş aparatları ilə zərbələr endirməkdə davam edir.
Sədaqət Həsənova
