Starmer gələn həftə istefa verə bilər. Bu cür müzakirələrin səbəbi Peter Mandelsonun ABŞ-dakı Britaniya səfiri vəzifəsinə təyin edilməsi ilə bağlı yaranan qalmaqaldır.
Gündəm24.az xəbər verir ki, Bloomberg agentliyinin hakim Leyboristlər Partiyasındakı mənbələrə istinadən verdiyi məlumata görə, Böyük Britaniyanın Baş naziri Keir Starmer bir həftə ərzində istefa verməyə məcbur edilə bilər .
Britaniyada siyasi gərginlik davam edir. Baş nazir Keir Starmerin taleyi Peter Mandelsonun ABŞ səfiri təyinatı və onun Jeffrey Epsteinlə dostluğu qalmaqalı üzündən sual altındadır. Bu qalmaqal artıq baş nazirin aparat rəhbəri Morqan MakSuininin bazar günü istefasına səbəb olub və Leyborist Partiyası daxilində narazılıq yaradıb.
Bəzi Leyborist deputatlar Starmerin hələ də vəzifədə qalmasına təəccüblənir və onun istefa ehtimalını “50-50” qiymətləndirirlər. Starmer vəzifəsini qorumaq üçün keçmiş müavini Angela Rayneri hökumətə qaytarmağı və Energetika naziri Ed Milibandı daha yüksək vəzifəyə təyin etməyi planlaşdıra bilər. Digər namizədlər arasında Səhiyyə naziri Ues Stritinq, Daxili İşlər naziri Şabana Mahmud, Xarici İşlər naziri İvet Kuper, Müdafiə naziri Con Heli və onun müavini Alistair Karns da var.
Peter Mandelson 2025-ci ilin fevralında ABŞ səfiri təyin olunub, lakin sentyabrda Epsteinlə dostluğunun yeni təfərrüatları üzə çıxandan sonra işdən çıxarılıb. O həm lord titulundan, həm də səfir vəzifəsindən məhrum ediləcək. Epstein 2019-cu ildə həbs olunub, onun evinə azyaşlı qızların gətirilməsi ilə bağlı cinayət təqibi aparılıb, lakin maliyyəçinin 2019-cu ilin avqustunda həbsxana kamerasında intihar etməsindən sonra iş dayandırılıb.
Sədaqət Həsənova
