Bir çox meyvəni alıb evə gətirdikdən qısa müddət sonra xarab olduğunu görürük.
Buna aid çox misal səsləndirmək olar. Lakin bu dəfə konkret olaraq bir meyvədən danışacağıq. Belə ki, mağazalarda satışda gördüyümüz mandarinlər çox parlaq və ideal görünüşə sahib olur. Buna baxmayaraq, evə alıb gətirdikdən qısa müddət sonra fərqlər özünü biruzə verir. Mandarin kiflənir, tamı dəyişir və həcmi kiçilərək xarab olur.
Bəs bunun səbəbi nədir?
Qida eksperti İlkin Şirinov Hit.az açıqlamasında bildirib ki, idxal olunan məhsullar uzun yollardan keçərək daşınır:
“Həmçinin, bölgələrdən paytaxta gətirilən məhsullar da xeyli yol qət edir. Üstəlik, məhsullar uzun yol daşındıqdan sonra bir müddət anbarlarda saxlanılır. Mandarin kimi meyvələr mümkün qədər sərin yerlərə yerləşdirilir. Çünki mandarin digər sitrus meyvələrinə nisbətən daha nazik qabığa sahibdir. Sözügedən meyvədə zərbə alanda, hava nəmliyi və rütubət kimi müəyyən problemlər olanda kiflənmə prosesi daha tez gedir”.
Ekspert qeyd edib ki, ev şəraitində isə onların saxlanması tamam fərqli olur:
“Evdə otağın temperaturunun 20 dərəcə olduğunu nəzərə alsaq, təsiri görərik. Avtomatik olaraq sərindən isti yerə düşdüyü üçün kiflərin əmələ gəlməsi daha tez baş verir. Daşınma zamanı da müəyyən temperatur dəyişikliyinin olması məhsulun xarici görünüşünə və keyfiyyətinə mənfi təsir göstərir. Soyuq anbarlardan və sərin saxlanma şəraitindən isti evə gələn məhsul tez xarab olur. Çünki soyuq hava zəncirinin qırılması baş verir”.
