Bu gün insanların əksəriyyəti vaxtına qənaət etmək üçün yeməkləri mikrodalğalı sobada isidirlər. Xüsusilə evdə, iş yerlərində, kafe və restoranlarda tez-tez istifadə olunan bu cihaz qidanı qısa müddətdə qızdırmağa imkan verir.
Bəs yeməklərin mikrodalğalı sobada qızdırılmasının təhlükəsi varmı?
Redaktor.az-a danışan qida eksperti İlkin Şirinov bildirdi ki, ət və ət yeməklərini, müxtəlif balıqdan hazırlanmış qidaları mikrodalğalı sobalarda qızdırırlar.
“Amma tam qızmadığı halda, təbii ki, yeməyin bir hissəsi yarı qızmış, digər hissəsi isə qızmamış, soyuq vəziyyətdə olur. Bunun fərqinə varmadan istifadə edildikdə, insan sağlamlığı üçün ziyanı ola bilər. Mikrodalğalı sobalardan yalnız yemək qızdırmaq üçün istifadə oluna bilər. Burada yemək bişirməkdən, hazırlamaqdan söhbət gedə bilməz. O sobalarda qabların düzgün seçilməməsi, müxtəlif bərk plastiklərdən istifadə edilməsi, həmin plastiklərin keyfiyyətindən asılı olaraq yemək qızdırıldıqda qablardan müxtəlif kimyəvi maddələrin qidaya keçmə riski var”.
Onun sözlərinə görə, bəzən mikrodalğalı soba düzgün işlədilmir:
“Yəni əgər onun qapısında və ya sıx bağlı olan yerlərində hər hansı problem olarsa, qızdırma zamanı yeməyin keyfiyyətinə təsir göstərə bilər. Müxtəlif toyuq yeməkləri, ət yeməkləri mikrodalğalı sobada qızdırıldıqda, tam qızdırılmasına əmin olunmadıqda, yalnız yeməyin üst hissəsi qızır, alt hissəsi isə çiy qalır. Bəzən isə restoran və kafelərdə bir gün, iki gün saxlanılmış yeməyi mikrodalğalı sobada qızdırıb verirlər. Təbii ki, bu da zəhərlənmə riski yarada, bağırsaq pozğunluğuna, mədə pozğunluğuna gətirib çıxara bilər. Bu, təbii ki, riskdir.
Mikrodalğalı sobadan yalnız və yalnız qısa müddətdə hazırlanmış yeməklərin qızdırılması üçün istifadə etmək olar. Burada yemək bişirmək olmaz. Bir də bir, iki, üç gün saxlanılmış müxtəlif yeməkləri burada qızdırmaq insan sağlamlığı üçün risk yaradır”.
