ABŞ prezidentinin xüsusi nümayəndəsi Stiv Uitkoff ilə İranın xarici işlər naziri Abbas Arakçı arasında birbaşa əlaqə kanalı yenidən bərpa olunub.
Gündəm24.az xəbər verir ki, bu barədə “Axios” Amerika rəsmisinə və məlumatlı mənbəyə istinadən məlumat yayıb.
Bildirilir ki, Arakçı Uitkoffa müharibənin dayandırılması ilə bağlı mesajlar göndərib. Amerika rəsmisinin sözlərinə görə, buna baxmayaraq ABŞ İranla rəsmi danışıqlar aparmır.
Mənbənin məlumatına görə, Arakçı ehtimal ki, öz addımlarını İranın Ali Milli Təhlükəsizlik Şurasının katibi Əli Laricani ilə koordinasiya edir.
Həmçinin amerikalı rəsmi nəşrə bildirib ki, ABŞ Prezidenti Donald Tramp İranla razılaşmaya açıqdır. Bu razılaşma Tehrana “dünya ilə inteqrasiya etməyə və öz neftindən pul qazanmağa” imkan verə bilər.
“Prezident hər zaman razılaşmaya açıqdır. Lakin o, zəif mövqedən danışıqlar aparmır və bu münaqişənin başlamasına səbəb olan məsələlərdən geri çəkilmir”, – rəsmi şəxs qeyd edib.
“Drop Site News” nəşrinin iranlı rəsmilərə istinadən yazdığına görə isə, əslində Uitkoff tərəfindən mesajlar göndərilib, lakin Arakçı mesajları cavabsız qoyub.
Buna baxmayaraq, mənbələr neçə mesaj göndərildiyini və onların məzmununu açıqlamayıb.
