Avropa Komissiyasının sözçüsü Arianna Podesta Rusiya vətəndaşlarının Ukraynaya qarşı müharibəyə son qoymaq və ölkə daxilində vəziyyəti dəyişdirmək imkanına malik olduğunu bildirib.
Gündəm24.az xəbər verir ki, Podesta bu barədə “Vot Tak”ın Yuliya Navalnayanın Avropa İttifaqının rusiyalı milyarderlər Əlişir Usmanov və Mixail Fridmana qarşı sanksiyaları ləğv etməsi ilə bağlı açıqlamasına dair sualını cavablandırarkən deyib.
“Bu müharibəni dəstəkləyən bir hökumətin olub-olmayacağına Rusiya vətəndaşlarının özləri qərar verməlidir. Buna görə də, əgər Rusiya vətəndaşları bu müharibənin nəticələrini yaşayırsa, ölkə daxilində buna qarşı tədbir görmək imkanına malikdirlər”, – Podesta bildirib.
Aİ ölkələri sentyabrın 22-də Usmanov və Fridmanı Rusiyaya qarşı sanksiya siyahısından çıxarıb. Eyni zamanda, Rusiya ilə əlaqəli təxminən 3 min fiziki və hüquqi şəxsə qarşı tətbiq edilən məhdudiyyətlər üç il müddətinə uzadılıb. Reuters-in məlumatına görə, qərar Fransa və Lüksemburqun Usmanov və Fridmanın siyahıdan çıxarılmasını dəstəkləməsindən sonra əldə olunan razılaşmanın nəticəsi olub.
Bu qərar Ukrayna və bəzi Aİ ölkələrində narazılıqla qarşılanıb. Reuters-in məlumatına görə, Fransa Usmanovun sanksiya siyahısından çıxarılması məsələsində təzyiqlə üzləşdiyini bildirib. Azərbaycan tərəfi isə bu iddiaları rədd edib.
Sentyabrın 23-də Azərbaycan Prezidenti İlham Əliyev casusluq ittihamı ilə 10 il müddətinə azadlıqdan məhrum edilmiş Fransa vətəndaşı Martin Rayanı əfv edib. Reuters bu qərarın Usmanovun Aİ-nin sanksiya siyahısından çıxarılmasından bir gün sonra verildiyini yazıb. Paris isə Rayanın azadlığa buraxılmasını “humanitar jest” adlandırıb.
Fridman məsələsində isə Lüksemburqun mövqeyi diqqət çəkib. Reuters-in məlumatına görə, milyarder ölkəyə qarşı 16 milyard dollarlıq arbitraj iddiası qaldırıb. Lüksemburq hesab edib ki, Usmanov siyahıdan çıxarıldığı halda Fridmana qarşı sanksiyaların saxlanılması ilə bağlı mövqeyi zəifləyə bilər.\ajans
