Ukraynanın BMT-dəki keçmiş daimi nümayəndəsi və Prezident Ofisi rəhbərinin birinci müavini Serqiy Kislitsa təşkilatın 1 nömrəli konfrans zalındakı sürtülmüş, köhnə oturacaqların fotosunu paylaşıb.
Gündəm24.az Musavat.com-a istinadən xəbər verir ki, o, bu görüntünün BMT-nin mövcud vəziyyətini tam əks etdirdiyini bildirərək, qurumun “dəbdən düşmüş, nüfuzunu itirmiş və köklü dəyişikliyə ehtiyacı olan” bir struktur olduğunu vurğulayıb.
Kislitsa təşkilatın təməlinin qoyulduğu Yalta Konfransına istinad edərək BMT-nin artıq “sülh sütunu” rolunu icra edə bilmədiyini qeyd edib.
O, Rusiyanın Təhlükəsizlik Şurasındakı daimi yerini qoruduğu müddətcə vəzifəyə gələcək yeni Baş katibin də təşkilatın beynəlxalq nüfuzunu bərpa edə bilməyəcəyini diqqətə çatdırıb.
Bu paylaşım Türkiyə prezidenti Rəcəb Tayyib Ərdoğanın illərdir səsləndirdiyi BMT-də islahat çağırışlarını yenidən gündəmə gətirib.
Ərdoğan “Dəyişən dünyada qlobal ədalət axtarışı” başlıqlı məqaləsində Təhlükəsizlik Şurasının hələ də İkinci Dünya Müharibəsindən sonrakı strukturu əks etdirdiyini, qlobal qərarqəbuletmə mexanizmlərinin müasir dövrün tələblərinə uyğunlaşdırılmasının ləngidilə bilməyəcəyini vurğulayıb. Türkiyə lideri islahatların mərkəzində veto hüququnun ləğvinin dayandığını bildirib.
BMT Baş Assambleyasındakı çıxışlarında mövcud idarəetmə modelini kəskin tənqid edən Ərdoğan 190-dan çox ölkənin taleyinin 5 dövlətin iradəsindən asılı olmasını ədalətsizlik adlandırıb və məşhur “Dünya 5-dən böyükdür” tezisini bir daha xatırladıb.
