ABŞ və İran arasında atəşkəs şərtləri müzakirə olunur, lakin razılığın əldə olunma ehtimalı olduqca aşağıdır. “Axios” portalının məlumatlı mənbələrə istinadən yaydığı məlumata görə, ABŞ, İran və regional vasitəçilərdən ibarət qrup hazırda münaqişənin tamamilə dayandırılmasına yol aça biləcək 45 günlük potensial atəşkəs şərtlərini nəzərdən keçirirlər.
Gündəm24.az xəbər verir ki, portal bu danışıqları genişmiqyaslı eskalasiyanın qarşısını almaq üçün “son cəhd” kimi qiymətləndirir. Məlumata görə, danışıqlar Pakistan, Misir və Türkiyənin vasitəçiliyi ilə yanaşı, Vitkoff və Araqçi arasında birbaşa mesajlaşmalar vasitəsilə aparılır.
Amerikalı rəsmi şəxs portalın sorğusuna cavab olaraq bildirib ki, Tramp administrasiyası son günlərdə Tehrana bir neçə təklif göndərib, lakin İran rəsmiləri hələlik bu şərtləri qəbul etməyiblər. Mənbələr vasitəçilərin tərəflərlə iki mərhələli saziş üzərində işlədiyini qeyd edirlər. Birinci mərhələdə 45 günlük atəşkəsin elan olunması nəzərdə tutulur.
Mənbələrdən birinin sözlərinə görə, danışıqlar üçün daha çox vaxt tələb olunarsa, atəşkəs rejimi uzadıla bilər. Sazişin ikinci mərhələsində isə münaqişənin tam və yekun şəkildə dayandırılmasına dair razılığın əldə edilməsi planlaşdırılır./NOCOMMENT.az/
