Kolumbiyanın Popayan şəhərində modifikasiya edilmiş yük maşını idarəetməni itirərək tədbirdə izdihamın üzərinə çırpılıb, ilkin məlumatlara görə, ən azı üç nəfər ölüb, 40 nəfər yaralanıb.
Gündəm24.az xəbər verir ki, Popayanda keçirilən “Canavar Yük Maşını 2026” şousu dəhşətli faciə ilə nəticələnib. Bulevar Rose meydançasında nümayiş zamanı modifikasiya edilmiş yük maşını qəfil idarəetmədən çıxaraq təhlükəsizlik səddini aşıb və tamaşaçıların üzərinə çırpılıb. Nəticədə biri uşaq olmaqla 3 nəfər həyatını itirib, 40 nəfər isə müxtəlif dərəcəli xəsarətlər alıb, bəzilərinin vəziyyəti ağırdır.
Şəhər meri Xuan Karlos Munoz hadisənin cəmiyyətdə dərin sarsıntı yaratdığını bildirərək bunu faciə adlandırıb. Hadisə anını əks etdirən görüntülərdə qadın sürücünün maneəni keçdikdən sonra nəqliyyat vasitəsinə nəzarəti tam itirdiyi açıq görünür və izdiham içində panika yaşanır.
Polis rəisi Julian Castaneda isə ilkin araşdırmaların qəzanın mexaniki nasazlıqdan qaynaqlandığını göstərdiyini açıqlayıb. Onun sözlərinə görə, yük maşınının əyləc sistemi işləməyib, nəqliyyat vasitəsi qəfil sürətlənərək idarəolunmaz vəziyyətə düşüb. Hadisə yerinə çoxsaylı təcili yardım və xilasetmə qrupları cəlb olunub, yaralıların xəstəxanalara çatdırılması davam edir.
Sədaqət Həsənova
