İran Hərbi Dəniz Qüvvələri Hörmüz boğazı yaxınlığında üç ABŞ hərbi gəmisinə hücum etdiyini açıqladı. ABŞ Mərkəzi Komandanlığı hərbi gəmilərə hücumlardan məsul olan İran hərbi obyektlərini hədəf aldığını bildirdi. Səhər tezdən BƏƏ hava hücumundan müdafiə sistemlərinin raket və pilotsuz təyyarə hücumlarına cavab verdiyini açıqladı.
Gündəm24.az xəbər verir ki, Hörmüz boğazında vəziyyət sürətlə nəzarətdən çıxır. İran mediasının yaydığı məlumata görə, İran donanması bölgədə ABŞ-a məxsus üç esminesi dron və raketlərlə hədəfə alıb. Ardınca ABŞ Mərkəzi Komandanlığı İranın hərbi obyektlərinə zərbələr endirildiyini açıqlayıb və bu əməliyyatların Hörmüzdən keçən hərbi gəmilərə hücumlara cavab olduğunu bildirib.
Vaşinqton tərəfi “gərginliyi artırmaq istəmirik” açıqlaması versə də, İran ordusunun sözçüsü hava hücumlarının mülki ərazilərə də zərər vurduğunu iddia edib. Körfəz bölgəsində təhlükə siqnalları yüksələrkən, Birləşmiş Ərəb Əmirliklərində səhər saatlarında partlayış səsləri eşidilib.
BƏƏ Müdafiə Nazirliyi hava hücumundan müdafiə sistemlərinin raket və pilotsuz uçuş aparatlarını havada məhv etmək üçün aktiv şəkildə işə salındığını açıqlayıb. Rəsmi məlumatda ölkənin müxtəlif nöqtələrində eşidilən partlayışların məhz müdaxilə sistemlərinin fəaliyyəti ilə bağlı olduğu vurğulanıb. Regionda baş verən son hadisələr Yaxın Şərqdə genişmiqyaslı qarşıdurma riskini daha da artırıb.
Sədaqət Həsənova
