Ukrayna ordusu Rusiya ərazilərinə hücumlar təşkil etməklə Rusiya Prezidenti Vladimir Putinin Qələbə Günündə elan etdiyi atəşkəsi pozub.
Gündəm24.az xəbər verir ki, Rusiya ilə Ukrayna arasında müharibə fonunda gecə saatlarında hava hücumları yenidən şiddətlənib. Rusiya Müdafiə Nazirliyi hava hücumundan müdafiə sistemlərinin gecə yarısından bəri 260 Ukrayna pilotsuz uçuş aparatını məhv etdiyini açıqlayıb. Hücumların əsas hədəflərindən biri Perm bölgəsindəki sənaye obyektləri olub.
Perm qubernatoru düşmən dronlarının sənaye zonasına düşdüyünü və bütün təcili yardım qruplarının əraziyə cəlb edildiyini bildirib. Təhlükə səbəbilə müəssisə əməkdaşları təxliyə edilib. İlkin məlumata görə, hadisə nəticəsində ölən və yaralanan olmayıb.
Digər tərəfdən, Rostov vilayətinin Çaltır kəndində vurulan pilotsuz təyyarənin qalıqları yaşayış məntəqəsinə düşüb və ən azı 20 evə ziyan dəyib. Bütün bunların fonunda Kremlin elan etdiyi üç günlük atəşkəsin 8 maydan qüvvəyə minəcəyi açıqlanıb. Bildirilir ki, 10 maya qədər Rusiya ordusu Ukraynadakı hərbi hədəflərə zərbə endirməyəcək.
Sədaqət Həsənova
