Sumqayıt bulvarında tez-tez müşahidə olunan antisanitar vəziyyət sakinlərin narazılığına səbəb olub.

Sumqayit24.az-a müraciət edən vətəndaşların sözlərinə görə, havaların isinməsi ilə əlaqədar insanlar piknik etmək üçün yaşıllıq ərazilərə üz tuturlar və bəzi şəxslər yeyib-içdikdən sonra tullantıları zibil qablarının ətrafına ataraq ərazidə xoşagəlməz mənzərə yaradırlar.

Şikayətçilər bildirirlər ki, əgər bu ərazilərdə piknik etməyə icazə verilirsə, daha böyük və sayca daha çox zibil qabı quraşdırılmalı, eyni zamanda təmizliyə nəzarət gücləndirilməlidir.

“Şəhərin mərkəzində belə antisanitar vəziyyətin olması biabırçıdır. Əsasən piknikə gələn ailələr və yeniyetmələr tullantıları hara gəldi atırlar. İnsanlar anlamalıdırlar ki, yedikləri məhsulların qalıqlarını ya özləri ilə aparıb evdə atmalı, ya da səliqəli şəkildə xüsusi ayrılmış yerlərə yerləşdirməlidirlər”, – deyə vətəndaşlardan biri narahatlığını ifadə edib.