Millət vəkili, iqtisadçı Vüqar Bayramov bildirib ki, “Əmək Məcəlləsinə” edilən dəyişikliklərə əsasən, minimum əməkhaqqı məbləğinə ildə ən azı bir dəfə baxılacaq. “Bu da minimum əməkhaqqının artımında dövriliyin təmin olunması deməkdir. Eyni zamanda, bununla artımlar qanunla tənzimlənəcək”, – deyən V.Bayramov qeyd edib ki, minimum əməkhaqqındakı artım sadəcə aşağı maaş alanların deyil, eləcə də vahid tarif cədvəlinin bütün pillələri üzrə artımları əhatə edəcək:
“Belə ki, dövlət büdcəsindən maliyyələşdirilən sahələrdə çalışan işçilərin aylıq tarif (vəzifə) maaşları minimum əməkhaqqı artırılandan bir ay müddətində yeni məbləğə uyğunlaşdırılaraq artırılır. Bura sosial, elm, mədəniyyət, gənclər və idman, kənd təsərrüfatı, ekologiya və ətraf mühitin mühafizəsi, mənzil-kommunal, nəqliyyat və rabitə, meliorasiya, su təsərrüfatı və balıqartırma sahələrində çalışan dövlət qulluqçusu statusu olmayan işçilərin vəzifə maaşları daxildir”.
Minimum əməkhaqqına ildə ən azı bir dəfə baxılması ilə bağlı yeni dəyişikliklər Azərbaycanda maaş artımlarının daha sistemli və davamlı şəkildə həyata keçirilməsinə necə təsir göstərəcək?
Sfera.az-a bu barədə açıqlama verən Vətəndaşların Əmək Hüquqlarını Müdafiə Liqasının rəhbəri Sahib Məmmədov bildirib ki, minimum əməkhaqqına müəyyən dövrlərlə yenidən baxılır:
“Bu, hər il olmasa da, adətən iki ildən yenidən baxılır və inflyasiya, eləcə də digər iqtisadi amillər nəzərə alınaraq minimum hədd müəyyənləşdirilir. İldə bir dəfə baxılması isə avtomatik olaraq minimum əməkhaqqının artırılması demək deyil. Sadəcə olaraq göstəricilər yenidən qiymətləndirilir və mövcud hədd olduğu kimi də saxlanıla bilər. Yəni burada söhbət ciddi dəyişiklikdən getmir, bu, əslində adi bir prosedurdur”.
S.Məmmədov əlavə edib ki, digər tərəfdən, minimum əməkhaqqının artırılması yalnız minimum məbləğdə maaş alan şəxslərə birbaşa təsir göstərir:
“Ümumilikdə əməkhaqlarının artımı isə minimum əməkhaqqı həddindən o qədər də asılı deyil”.
