Birləşmiş Ştatlar Qrenlandiya gələcəkdə müstəqillik əldə edəcəyi təqdirdə belə, öz hərbi qüvvələrinin adada müddətsiz olaraq yerləşdirilməsinə nail olmağa çalışır. “The Washington Post” qəzetinin məxfi diplomatik mənbələrə istinadən yaydığı məlumata görə, Vaşinqton hazırda qüvvədə olan ikitərəfli hərbi müqavilənin şərtlərini dəyişmək üçün fəal iş aparır.
Gündəm24.az NOCOMMENT.az-a istinadən xəbər verir ki, ABŞ-ın əsas məqsədi amerikalı hərbçilərin adadakı strateji bazalarda qeyri-müəyyən müddətə qalmasını hüquqi cəhətdən təmin etməkdir. Bununla yanaşı, Ağ Ev administrasiyası regional təhlükəsizlik adı altında Qrenlandiyaya qoyulacaq böyük həcmli xarici investisiyalara veto qoymaq hüququ əldə etməyi də müzakirə edir. Vaşinqton bu addımla rəqibləri olan Rusiya və Çinin Arktika bölgəsində iqtisadi və siyasi təsir imkanlarını maksimum dərəcədə məhdudlaşdırmağı hədəfləyir.
Nəşr qeyd edir ki, ABŞ-ın bu təşəbbüsü həm Danimarka Krallığında, həm də geniş muxtariyyətə malik Qrenlandiyanın yerli hökumətində kəskin narazılıq və etiraz dalğası yaradıb. Kopenhagen və Nuuk (Qrenlandiyanın paytaxtı) Vaşinqtonun bu tələblərini öz suverenliklərinə birbaşa müdaxilə kimi qiymətləndirirlər.
