Azərbaycan və Gürcüstan 26 may 2026-cı il tarixindən etibarən Bakı-Tbilisi-Bakı marşrutu üzrə gündəlik sərnişin qatarlarının xidmətini bərpa etmək barədə razılığa gəliblər. Bu razılaşma iki ölkə arasında imzalanmış Koordinasiya Şurasının Protokolunda əks olunub.
Qeyd edilib ki, Protokol həmçinin dəmir yolu infrastrukturunun idarə olunmasına nəzarəti “BTKI Dəmir Yolları” MMC Birgə Müəssisəsinə ötürməyi təsdiqləyir ki, bu da regional bağlantının gücləndirilməsində mühüm addımdır.
Maraqlıdır, yeni reyslər üzrə bilet qiymətlərinin hansı aralıqda olacağı gözlənilir?
Bununla bağlı Sfera.az-a açıqlama verən nəqliyyat eksperti Raqif Raufoğlu bu məsələ ilə bağlı müəyyən tənqidlərin səsləndiyini söyləyib:
“Məsələn, Bakı-Balakən marşrutu üzrə əvvəlki qiymətlərlə müqayisə aparıldıqda bildirilir ki, yeni tariflər ən azı üç dəfə bahalaşıb. Bu baxımdan yanaşdıqda görünür ki, burada da qiymətlər 100 manatdan aşağı olmayacaq. Digər tərəfdən, qatarların yeni olması və vaqonların komfort, ekonom və digər siniflərə bölünməsi də qiymətlərə təsir edən amillərdən biridir. Mövcud nümunələrə əsasən ehtimal etmək olar ki, qiymətlər təxminən bu aralıqda formalaşacaq. Təbii ki, yekun məbləğ tətbiq olunacaq tarif siyasətindən və sinif bölgüsündən asılı olacaq”.
Ekspert əlavə edib ki, hazırda müşahidə olunan tendensiya ondan ibarətdir ki, yeni şərtlərlə təqdim olunan qatar biletləri əvvəlki dövrlə müqayisədə xeyli bahadır:
“Avropa ilə müqayisə aparmaq düzgün olmaz, çünki orada fərqli iqtisadi və nəqliyyat reallığı mövcuddur. Məsələn, bəzi ölkələrdə təyyarə ilə səyahət qatardan daha ucuz başa gəlir. Azərbaycanda isə onsuz da aviabiletlər ucuz hesab edilmir və insanlar qatarın daha sərfəli alternativ olacağını gözləyirlər. Əgər qatar biletləri də eyni şəkildə yüksək qiymətlərlə təklif olunarsa, bu halda sərnişinlər faktiki olaraq iki bahalı seçim arasında qərar verməli olacaqlar”.
Xatırladaq ki, Azərbaycandan Gürcüstana sərnişin qatarlarının fəaliyyətinin dayandırılmasından əvvəl qiymətlər fərqli idi. Plaskartda (açıq kupe) bir nəfər üçün qiymət 24-26 manat, kupedə 35-40 manat, SV-də (yataqlı) 57-60 manat təşkil edirdi.
