Sumqayıtda pedaqoq, şair, publisist və dramaturq, şəhərin fəxri vətəndaşı Əvəz Mahmud Lələdağın “Düşmənə inanan özünə düşməndir” kitabının təqdimat mərasimi keçirilib.
Gündəm24.az xəbər verir ki, tədbir Qərbi Azərbaycan İcmasının Sumqayıt nümayəndəliyinin təşkilatçılığı və Yazıçılar Birliyinin Sumqayıt bölməsinin təşəbbüsü ilə baş tutmuşdur. Təqdimat mərasimində şəhərin ziyalıları, elm və mədəniyyət nümayəndələri, ictimaiyyət üzvləri, media təmsilçiləri və gənclər iştirak ediblər.
Tədbiri tanınmış şair, Azərbaycan Yazıçılar Birliyinin üzvü İbrahim İlyaslı aparıb. O, çıxışında Əvəz Mahmud Lələdağın çoxşaxəli yaradıcılığından, Azərbaycan ədəbiyyatına və maarifçiliyinə verdiyi töhfələrdən danışıb.
Qərbi Azərbaycan İcmasının Sumqayıt nümayəndəliyinin sədri Ramiz İsmayılov çıxışında Əvəz Mahmud Lələdağın yaradıcılığının milli düşüncənin formalaşmasında mühüm rol oynadığını vurğulayıb. O qeyd edib ki, müəllifin əsərlərində vətənpərvərlik, milli birlik və mənəvi dəyərlər xüsusi yer tutur. Çıxışında qeyd edib ki, Əvəz Mahmud Lələdağın əsərlərində hər zaman Qərbi Azərbaycan həqiqətlərinin təbliği, tarixi yaddaşın qorunması və gələcək nəsillərə çatdırılması mühüm yer tutub.
Tədbirdə Sumqayıt şəhər İcra Hakimiyyəti başçısının birinci müavini Teymur Səmədov çıxış edərək, Əvəz Mahmud Lələdağın həyat və yaradıcılığı barədə geniş məlumat verib. onun Azərbaycan ədəbiyyatına, təhsilinə və ictimai həyatına verdiyi töhfələri yüksək qiymətləndirib. Bildirib ki, Əvəz müəllim həm pedaqoq, həm də ziyalı kimi Sumqayıt şəhərinin ictimai-siyasi və mədəni həyatında mühüm rol oynayıb, şəhərin adını daim ucaldıb. Teymur Səmədov dövlət tərəfindən elm, ədəbiyyat və incəsənət xadimlərinə göstərilən diqqət və qayğının Əvəz Mahmud Lələdağın həyat yolunda da öz əksini tapdığını vurğulayıb.
Çıxışlarda yazıçının müxtəlif illərdə “Ən yaxşı müəllim” və “Ən yaxşı məktəb” müsabiqələrinin qalibi olduğu, Təhsil Nazirliyinin “Qabaqcıl təhsil işçisi” döş nişanı, “Tərəqqi” medalı, Prezidentin fəxri diplomu və “Heydər Əliyevin 100 illiyi” yubiley medalı ilə təltif edildiyini diqqətə çatdırılıb.
Qeyd olunub ki, Əvəz Mahmud Lələdağ uzun illər müəllim kimi minlərlə şagirdin yetişməsində mühüm rol oynayıb, Azərbaycan maarifçiliyinə dəyərli töhfələr verib. onun 560-dan çox elmi-publisistik və metodik məqaləsi, eləcə də çoxsaylı kitabları ədəbi ictimaiyyət tərəfindən maraqla qarşılanıb.
müəllifin əsərləri oxuculara düşündürücü mesajlar verir və cəmiyyət üçün mühüm əhəmiyyət daşıyır.
Əvəz Mahmud Lələdağ ömrünü Azərbaycan təhsilinə və milli-mənəvi dəyərlərin təbliğinə həsr edib. Müəllifin əsərləri milli düşüncə, tarix və vətən sevgisini özündə əks etdirən mühüm nümunələrdəndir. Əvəz Mahmud Lələdağ şəhərin inkişafı, mədəni-mənəvi dəyərlərinin qorunması və təbliği istiqamətində mühüm fəaliyyət göstərib. Milli birlik, vətən sevgisi və Azərbaycançılıq ideyaları geniş şəkildə təbliğ olunur.
Tədbir çərçivəsində şairin poeziyasına həsr olunmuş ədəbi-bədii kompozisiya təqdim edilib. Əvəz Mahmud Lələdağın sevilən şeirlərindən parçalar səsləndirilib, onun həyat və yaradıcılıq yolundan bəhs edən film nümayiş olunub.
Sonda çıxış edən Əvəz Mahmud Lələdağ tədbirin təşkilatçılarına, iştirakçılara və onun yaradıcılığına göstərilən diqqətə görə minnətdarlığını bildirib. O qeyd edib ki, ömrü boyu Azərbaycan təhsilinə, ədəbiyyatına və milli-mənəvi dəyərlərin təbliğinə xidmət etməyə çalışıb. Müəllif gənclərin vətənpərvərlik ruhunda yetişməsinin vacibliyini vurğulayaraq, bundan sonra da yaradıcılıq fəaliyyətini davam etdirəcəyini bildirib. Tədbir iştirakçıları yazıçıya yeni yaradıcılıq uğurları arzulayıblar.
