Kolumbiyada bir müəllim şagirdlər qarşısında çıxış etdikdən və mahnı ifa etdikdən sonra huşunu itirərək vəfat edib.
Gündəm24.az xəbər verir ki, bu barədə “Need To Know” məlumat yayıb.
Hadisə Bolivar departamentinin Arxona şəhərində baş verib. 54 yaşlı Orlando Marrugo Müəllimlər Günü münasibətilə təşkil olunan tədbirdə 11-ci sinif şagirdləri qarşısında qısa nitq söyləyib, daha sonra “Sin Más Palabras” (“Başqa sözlər olmadan”) adlı mahnını ifa edib.
Musiqi dayandırıldıqdan sonra müəllim şagirdlərə “Mən burada dayanacağam” deyib, bir neçə addım atıb və qəfil yerə yıxılıb.
Şagirdlər dərhal ona ilkin tibbi yardım göstərməyə çalışıblar, lakin o, bir neçə dəqiqə sonra həyatını itirib. İlkin məlumata görə, müəllimin infarkt keçirdiyi bildirilir.
Yerli sakinlər Orlando Marrugonu şəhərin tanınmış müəllimlərindən biri kimi xarakterizə ediblər. O, pedaqoji fəaliyyəti ilə yanaşı, xalq musiqisinə və yerli ənənələrə olan sevgisi ilə də seçilib./Ajans.az
