Andrey Belousovun Bakı səfəri: Hərbi əməkdaşlıqda yeni mərhələ, yoxsa regional təhlükəsizlik dialoqu? – AÇIQLAMA
Rusiyanın müdafiə naziri Andrey Belousovun bu ilin oktyabr ayında Bakıya gözlənilən səfəri regionda böyük maraqla və diqqətlə izlənilir. Bu səfər təkcə Azərbaycan-Rusiya hərbi əməkdaşlığının gələcək istiqamətlərinin müəyyənləşdirilməsi baxımından deyil, həm də Cənubi Qafqazın ümumi təhlükəsizlik arxitekturasına mümkün təsirləri kontekstində mühüm əhəmiyyət daşıyır.
Məsələ ilə bağlı hərbi ekspert Anar Şuşalı Oxu24.com-a şərhində səfərin pərdəarxası məqamlarını və regiona verəcəyi mesajları təhlil edib.
Hərbi ekspert Anar Şuşalı bildirib ki, Andrey Belousovun Bakıya gözlənilən səfəri iki ölkə arasında hərbi və regional təhlükəsizlik formatında yeni bir mərhələnin başlanğıcı ola bilər:
“Belousovun Bakıya səfəri iki ölkə arasında hərbi əməkdaşlığa nə vəd edir və regionun təhlükəsizlik mühitinə necə təsir göstərə bilər? Sualına cavab axtarsaq, ilk növbədə yaranmış yeni geosiyasi reallıqları nəzərə almalıyıq. Azərbaycan və Rusiya arasında hərbi əməkdaşlıq uzun illərdir davam edir. İki ölkə arasında müdafiə və hərbi-texniki sahələrdə əməkdaşlıq haqqında müxtəlif sənədlər mövcuddur. Son illərdə bölgədə yaranmış yeni geosiyasi reallıqlar isə tərəfləri təhlükəsizlik məsələlərini daha sıx müzakirə etməyə vadar edir”.
Anar Şuşalının fikrincə, rəsmi Bakının yürütdüyü xarici siyasət xətti bu səfərin formatını müəyyən edən əsas amildir:
“Azərbaycan balanslaşdırılmış xarici siyasət kursunu davam etdirir və müxtəlif ölkələrlə, o cümlədən Türkiyə, Pakistan, Rusiya, İsrail və NATO üzvü olan dövlətlərlə müdafiə sahəsində əməkdaşlıq edir. Bu baxımdan Rusiyanın müdafiə nazirinin səfəri Azərbaycanın çoxşaxəli təhlükəsizlik siyasətinin tərkib hissəsi kimi qiymətləndirilə bilər.
Analitiklər hesab edirlər ki, Bakı ilə Moskva arasında hərbi dialoqun intensivləşməsi Cənubi Qafqazda sabitliyin qorunmasına xidmət edə bilər. Xüsusilə Azərbaycan-Ermənistan normallaşma prosesinin davam etdiyi bir dövrdə böyük regional oyunçular arasında təhlükəsizlik məsələlərinin müzakirəsi əlavə əhəmiyyət kəsb edir”.
Ekspert vurğulayır ki, Belousovun Bakı dialoqunda müzakirə ediləcək mövzuların spektri kifayət qədər genişdir:
•Regional və sərhəd təhlükəsizliyinin təmin olunması;
•Hərbi təhsil sahəsində birgə əməkdaşlıq proqramları;
•Terrorizmə və regional təhdidlərə qarşı müştərək mübarizə;
•Hərbi-texniki əlaqələrin yeni perspektivləri.
Digər tərəfdən, Rusiya-Ukrayna müharibəsinin davam etdiyi hazırkı şəraitdə Moskvanın Cənubi Qafqaza diqqətini artırması da təsadüfi deyil. Anar Şuşalı qeyd edir ki, bu baxımdan Belousovun səfəri Rusiyanın regiondakı təhlükəsizlik və siyasi mövqelərini qorumaq istiqamətində atdığı strateji addımlardan biri kimi də oxuna bilər.
Nəticə etibarilə, Rusiyanın müdafiə nazirinin Bakıya gözlənilən oktyabr səfəri Azərbaycan-Rusiya hərbi əməkdaşlığında yeni müzakirə imkanları yaradacaq və regional təhlükəsizlik gündəliyinin əsas məsələlərinin həllinə əlavə impuls verəcək. Lakin ekspertin də vurğuladığı kimi, səfərin konkret və praktiki nəticələrini yalnız rəsmi görüşlərin yekunlarından sonra tam dəqiqliyi ilə qiymətləndirmək mümkün olacaq.
