Ermənistanda baş tutan seçkilər və nəticələrin bəlli olmasından sonra bir sıra ölkələr qələbə münasibətilə baş nazir Nikol Paşinyanı təbrik ediblər. Bu sırada xüsusilə də Qərb ölkələri seçilirlər. MDB məkanında Qazaxıstan da Ermənistandakı seçkilərə müsbət münasibət bildirib.
Amma nədənsə, hələ də Rusiya susur. Kreml bu günə qədər seçkilərə hər hansı bir rəsmi reaksiya verməyib.
Əksinə, bəzi rəsmi nümayəndələrin dilindən seçkilərdə erməni müxalifətinin sıxışdırıldığı iddiaları səslənir. Bu xüsusda əsasən də Rusiya Xarici İşlər Nazirliyinin sözçüsü Mariya Zaxarova daha çox canfəşanlıq edir.
Bakupost.az xəbər verir ki, XİN sözçüsü səsvermə prosesi zamanı müxalif qüvvələrin ciddi sıxışdırıldığını bəyan edib. Hətta o, iddia edib ki, seçki prosesi hakimiyyətin müxalifətə qarşı görünməmiş inzibati təzyiqləri altında reallaşıb.
“Atlas” Araşdırmalar Mərkəzinin rəhbəri Elxan Şahinoğlu Bakupost.az-a bildirib ki, Putinin yaxın günlərdə İrəvana münasibətdə ritorikasının dəyişəcəyi də istisna deyil:
“Moskvanın Ermənistanla bağlı iki seçimi var. Kreml İrəvana təzyiqləri davam etdirə, yenə də Ermənistan əleyhinə açıqlamalar verə, kənd təsərrüfatı məhsullarının Rusiyaya növbəti ixracını qadağan edə bilər. Amma bu halda iki ölkə arasında münasibətlər daha da gərginləşəcək və Ermənistan Rusiyadan daha da uzaqlaşacaq. Bu isə əslində Moskvanın maraqlarına ziddir. Digər tərəfdən, ola da bilsin bir müddət sonra Rusiya Prezidenti Vladimir Putin yenidən Paşinyanla yola davam etmək məcburiyyətində qalsın. Bu fonda onu qələbə münasibətilə təbrik edib-etməyəcəyini yaxın günlərdə görəcəyik”.
Rusiyanın hələlik Paşinyanı təbrik etməkdən yayınmasına gəldikdə, həmsöhbətimizin sözlərinə görə, yaxın günlərdə Kreml bu istiqamətdə siyasətini müəyyən dərəcədə yumşaltmalı olacaq:
“Rusiya bir sıra rəsmilərin timsalında Paşinyanı o qədər aşağıladı, təhqir etdi ki, indi mövqelərini birdən-birə qəfil dəyişə də bilmirlər. Amma artıq seçkilərin nəticəsi bəllidir. Paşinyan daha 5 il hakimiyyətdə qalacaq. Bu mənada hesab edirəm ki, yaxın günlərdə Rusiya hakimiyyəti Ermənistanla bağlı siyasətini nisbətən korrektə etmək məcburiyyətindədir.
Ermənistan parlamentində Rusiyaya bağlı güclü müxalifət də formalaşır. Bu əsasda Kreml müxalifətdən istifadə edərək, Paşinyana təzyiqləri artıra da bilər”.
