Sumqayıt şəhərində 30 yaşlı kişi həyat yoldaşına qarşı cinayət törədib.
Məlumata görə, Göyçay rayon sakini, Orxan arvadı Sənəm (adlar şərtidir – red.) ilə mübahisə edib və ona şillə zərbələri vuraraq xəsarətlər yetirib.
Faktla bağlı Orxanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Orxan ona elan olunmuş ittiham üzrə özünü təqsirli bilib. O bildirib ki, Sənəm ilə rəsmi qaydada ailə həyatı qurub, nikahdan üç övladları dünyaya gəlib.
“Məlum hadisə günü Sənəm ev üçün qaz sobası almışdı. Həmin gün axşam evdə olduğumuz zaman qaz sobasına ehtiyacımızın olmadığını və əlavə xərc çəkdiyini dedim. Sənəmlə mübahisə etməyə başladım. O, isə bu məsələdə haqlı olduğunu bildirdi. Bu zaman əsəbiləşərək əlim ilə onun sol qol nahiyəsinə şillə zərbəsi endirdim və evi tərk edərək getdim”, – deyə Orxan bildirib.
Sumqayıt Şəhər Məhkəməsində araşdırma zamanı onların barışdıqları məlum olub. Bununla bağlı onlar məhkəməyə rəsmi qaydada ərizə təqdim ediblər. Orxan cinayət məsuliyyətindən azad edilib.
Mənbə: Demokrat.az
