Sumqayıt şəhərində yerləşən “Liman Klinikası” qüsurlu əməliyyata görə pasiyentə təzminat ödəyəcək.
Məlumata görə, məhkəmə belə qərar qəbul edib.
İddiaçı Nuridə Zülfüqarova 2024-cü ildə “Liman Klinikası”nda cərrah Əfqan Ağagülov tərəfindən burun əməliyyatı olunub. Lakin əməliyyatdan sonra onun sol gözündə çəplik yaranıb.
Hadisə ilə bağlı aparılan prokurorluq araşdırması nəticəsində cinayət işi başlanmayıb, lakin məhkəmə-tibb ekspertizası əməliyyatın qüsurlu aparıldığını təsdiqləyib.
İddiaçı tərəf klinikadan və həkimdən 40 min manat maddi, 10 min manat isə mənəvi təzminat tələb edib. Cavabdehlər isə iddiaları qəbul etməyiblər və problemin əməliyyatdan sonrakı düzgün müalicə olunmaması ilə bağlı olduğunu bildiriblər.
Sumqayıt Şəhər Məhkəməsi iddianı qismən təmin edib. Qərara əsasən, “Liman Qrup” MMC iddiaçıya 28 574 manat maddi, 3 000 manat isə mənəvi təzminat ödəməlidir. Həkim Əfqan Ağagülova qarşı iddia isə təmin edilməyib. Məhkəmə qeyd edib ki, həkim klinikanın işçisi olduğundan vurulmuş zərərə görə məsuliyyəti işəgötürən daşıyır.
Qərar apellyasiya və ali instansiya məhkəmələri tərəfindən də qüvvədə saxlanılıb.
Qeyd edək ki, zərərçəkənin ailəsi daha əvvəl məsələ ilə bağlı mediaya müraciət edərək əməliyyatdan sonra yaranan problemin həll olunmadığını bildirmişdi.
Mənbə: Qafqazinfo.az
