Ölkə ərazisində heyvanlar arasında qabaqcadan xəbərdarlıq edilən dabaq xəstəliyi sürətlə yayılmaqda davam edir. Yoluxucu virus inək, camış, qoyun, keçi və donuzlarda ağrılı yaralar əmələ gətirir, heyvanların yem yeməsini çətinləşdirir və süd, çəki itkilərinə səbəb olur. Bəs bu proses ətin qiymətinə necə təsir edəcək?
Mövzu ilə bağlı Gündəm24.az-a açıqlama verən qida eksperti İlkin Şirinov bildirib ki, belə xəstəliklərin qarşısını almaq üçün qabaqlayıcı tədbirlər xəstəlik yayılmamışdan əvvəl görülməli idi və məsul şəxslər vaxtında addımlar atmalı idilər.
“Heyvanların yemlənməsi və saxlanma şəraiti xüsusi diqqət tələb edir. Heyvanların yemlənməsi normalara uyğun aparılmalı, saxlanıldığı yerlər daim nəzarətdə olmalı və müntəzəm olaraq dezinfeksiya edilməlidir. Şəxsi təsərrüfatlarda yem və suyun keyfiyyətinə ciddi nəzarət olunmalıdır. Əks halda, xəstəlik heyvanlara ciddi təsir göstərəcək,” – deyə ekspert vurğulayıb.
O əlavə edib ki, əgər heyvanların saxlanıldığı yerlərdə sanitar qaydalar kobud şəkildə pozulursa və ətraf mühit natəmizdirsə, xəstəlik daha geniş miqyasda yayılacaq. O, qeyd edib ki:
“Bu kimi hallar yalnız heyvanların sağlamlığı üçün təhlükə yaratmır, həm də bazarlarda ətin qiymətinə təsirsiz ötüşməyəcək. Xəstəlik nəticəsində bazarlarda heyvan qıtlığı yarana bilər və bu, həm ətin, həm də süd məhsullarının qiymətinə ciddi təsir göstərəcək.”
Ekspert həmçinin bildirib ki, xüsusi kəsim məntəqələrində kəsilən heyvanların nümunələri baytarlar tərəfindən laboratoriyada dəqiq analiz olunmalıdır:
“Yəni, heyvanlar vizual olaraq yoxlanmamalıdır. Baytarlığın laboratoriyalarında aparılan analizlər nəticəsində heyvanların cəmdəklərinə uyğun müayinə aparılmalı və yalnız nəticəyə uyğun rəy verilməlidir.”
İlkin Şirinov ev təsərrüfatlarında saxlanılan heyvanların yemlənmə və saxlanma şəraitinə xüsusi diqqət göstərilməsini tövsiyə edib. Onun sözlərinə görə, suyun keyfiyyəti, yemin düzgün saxlanması və sanitar qaydaların tətbiqi xəstəliyin yayılmasının qarşısını ala bilər.
“Ən əsası, heyvanların saxlanıldığı yerin təmiz olması və sanitar qaydaların qorunmasıdır. Əgər bu qaydalar pozulursa, xəstəlik həm heyvanlara əziyyət verəcək, həm də bazar qiymətlərinə mənfi təsir göstərəcək,” – deyə ekspert vurğulayıb.
Ekspertin fikrincə, qabaqlayıcı tədbirlər vaxtında görülməsə, xəstəlik geniş miqyasda yayıla və ölkə iqtisadiyyatına ciddi təsir göstərə bilər. Bu baxımdan, heyvan saxlayan təsərrüfatlarda ciddi nəzarət mexanizmlərinin tətbiqi, yem və suyun keyfiyyətinin təmin edilməsi, dezinfeksiya və sanitar qaydaların tam icrası həyati önəm daşıyır.
İlkin Şirinov müsahibəsinin sonunda əlavə edib ki, vətəndaşlar ev təsərrüfatlarından alınan heyvan məhsullarını alarkən onların keyfiyyətinə diqqət yetirməli, bazarlarda ətin və süd məhsullarının təhlükəsizliyinə xüsusi önəm verməlidirlər.
Elay RZAZADƏ,Gündəm24.az
