ABŞ-da texnologiya mütəxəssisləri işlərini itirmək qorxusundan plastik əməliyyata üz tuturlar. Səbəb isə şirkətlərin daha gənc işçiləri üstün tutmasıdır.
Gündəm24.az xəbər verir ki, bu barədə “The Wall Street Journal” yazır.
Nəşr bildirir ki, ABŞ texnologiya sektorunda 30 yaşdan yuxarı olanlara qarşı bir növ “yaş stereotipi” formalaşıb.
Buna görə də, Silikon Vadisində çalışan bir çox kişi daha gənc görünmək üçün mini üzqaldırma, boyun dartma və göz qapaqlarının korreksiyası kimi əməliyyatlara minlərlə dollar xərcləyir.
San-Fransiskoda fəaliyyət göstərən plastik cərrah Timoti Marten deyir:
“Əvvəllər gənc görünmək üçün daha çox qadınlar təzyiq hiss edirdi, indi isə bu, kişilərə də sirayət edib. Silikon Vadisində bir az qoca görünsən, sənə “yaşlı” damğası vururlar”.
Məlumata görə, Kaliforniyada kişilər arasında bu cür əməliyyatlara maraq son illərdə kəskin artıb. Belə ki, pandemiyadan əvvəlki dövrlə müqayisədə tələb 25%, əməliyyatların sayı isə 50% çoxalıb.
Plastik cərrahlar deyir ki, 30 yaşa qədər kişilər adətən botoks və dolğu kimi qeyri-cərrahi üsulları, 40 yaşdan sonra isə artıq ciddi cərrahi əməliyyatları seçirlər.
Elay RZAZADƏ,
Gündəm24.az
