Bakının Nizami rayonunda restoranda dava olub, ər arvadına xəsarət yetirib.
Gündəm24.az-ın əldə etdiyi məlumata görə, hadisə “Nəğmə” restoranının kabinetində baş verib. Ağstafa rayon sakini, 1987-ci il təvəllüdlü Nəsib arvadı Zemfira (adlar şərtidir – red.) ilə mübahisə edib.
Arvadı ilə birlikdə yemək yeyib, spirtli içki qəbul etdiyi üçün sərxoş vəziyyətdə olarkən həmin restoranda təsadüfən əvvəllər sevgi münasibətində olduğu Samirə ilə rastlaşıb. Samirə ilə arvadı Zemfira mübahisə edib. Qısqanclıq zəminində mübahisə etmələrinə irad bildirməsinə arvadının ona kobud cavab verməsi mübahisəni daha da şiddətləndirib.
Bu zaman Nəsib arvadının sifətinin sağ nahiyəsinə və şillə ilə dodaq nahiyəsinə vuraraq ona müxtəlif dərəcəli xəsarətlər yetirib.
Faktla bağlı Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Nəsib ona elan olunmuş ittiham üzrə özünü təqsirli bilib. Zərərçəkmiş də ifadəsində əri ilə barışdığını, ona qarşı şikayəti və tələbi olmadığını, ona maddi ziyan dəymədiyini bildirib.
Nizami Rayon Məhkəməsinin hökmü ilə Cinayət Məcəlləsinin 73.2-ci maddəsinin tələblərinə əsasən, təqsirləndirilən şəxs cinayət məsuliyyətindən azad edilib, iş üzrə icraata xitam verilib./Demokrat
