Sumqayıt şəhəri və Saray qəsəbəsində antisanitar vəziyyətlə bağlı şikayətlər var.
Gündəm24.az bildirir ki, Sumqayit24.az-a müraciət edən vətəndaşların sözlərinə görə, şəhərin müxtəlif ərazilərində zibillərin vaxtında daşınmaması səbəbindən antisanitar vəziyyət yaranır.
Xüsusilə Sumqayıt Dəmiryol Vağzalının yaxınlığında məişət tullantılarının gec-gec daşındığı bildirilir. Nəticədə şəhərin ən çox istifadə olunan ərazilərindən birində xoşagəlməz mənzərə yaranır.
Bundan əlavə, Saray qəsəbəsinin bəzi ərazilərində də antisanitar vəziyyətin hökm sürdüyü qeyd olunur. Sakinlərin sözlərinə görə, ərazidə zibil qutularının olmaması müxtəlif problemlər yaradır.
“Əraziyə həftədə bir dəfə ödənişli şəkildə maşınlar gəlir və pul müqabilində zibilləri qapılardan yığırlar. Kimisi maddi imkansızlıqdan, kimisi də ödəmək istəmədiyindən bundan imtina edir. Bu da insanların zibilləri ətrafa atmasına səbəb olur.
Bəziləri isə zibilləri yandırır və nəticədə ərazidə antisanitar vəziyyət yaranır. Bizim də övladlarımız həmin zibillərin iyini, qoxusunu udurlar”, – deyə sakinlər bildiriblər.
Vətəndaşlar aidiyyəti qurumlardan zibillərin vaxtında daşınmasını və qəsəbədə zibil qutularının yerləşdirilməsini tələb edirlər.
