Türkiyənin “Pegasus” aviaşirkəti sentyabrın 2-nə keçən gecə Moskvaya uçan bir neçə təyyarəni havada geri döndərib, ardınca isə Rusiya istiqamətində onlarla reysi ləğv edib.
Musavat.com xəbər verir ki, “Ostorojno, novosti” və “Post” kanallarının məlumatına görə, Bodrum–Moskva, İzmir–Moskva və Antalya–Moskva reyslərini həyata keçirən təyyarələr uçuş zamanı geri dönərək Türkiyədəki hava limanlarına qayıdıblar.
Səhər saatlarında isə İstanbuldan Moskva və Sankt-Peterburqa, eləcə də Antalya, İzmir və Dalamandan Rusiyanın müxtəlif şəhərlərinə planlaşdırılmış onlarla reys ləğv edilib. Rusiyadan Türkiyəyə əks istiqamətdə uçuşların da bir hissəsi baş tutmayıb.
Ləğv edilmiş reyslərdən birinin sərnişinlərinə “Pegasus” nümayəndəsinin “Türkiyə tərəfi uçuşlara icazə vermir” dediyi bildirilir. Şirkətin Rusiya aviakassalarında isə yaxın günlərdə Moskvaya uçuşların davam edib-etməyəcəyinin məlum olmadığı deyilib.
Hadisələr Ukrayna Prezidenti Volodimir Zelenskinin Rusiya hava məkanının getdikcə təhlükəli olacağı barədə xəbərdarlığından sonra baş verib. Zelenski Rusiya hava məkanından və əsas hava limanlarından istifadə edən aviaşirkət və sığorta şirkətlərinə müraciət edərək risklərin artacağını bildirib.
“Biz mülki təyyarələrə hücum etməyəcəyik, lakin Rusiya səmasında nəzərə alınmalı miqyasda pilotsuz uçuş aparatları olacaq”, – Zelenski deyib. Onun sözlərinə görə, bu vəziyyət ilk növbədə Moskva və Sankt-Peterburq kimi əsas istiqamətlərə təsir göstərə bilər.
Sentyabrın 2-nə keçən gecə dron təhlükəsi səbəbindən Moskva hava limanlarında təxminən 80 reysin ləğv edildiyi və ya gecikdirildiyi bildirilir. Rusiya Müdafiə Nazirliyi isə gecə ərzində ölkənin 11 regionu və Krım üzərində ümumilikdə 130 Ukrayna dronunun vurulduğunu açıqlayıb.
Vladimir Putin Zelenskinin bəyanatını “dövlət terrorizminə iddia” adlandıraraq Rusiyanın cavab verəcəyini bildirib. Rusiyanın nəqliyyat naziri Andrey Nikitin isə mülki aviasiyanın fəaliyyətində ciddi fasilələrə yol verilməyəcəyini vəd edib.
