Dünyada son illər populyarlaşan yeni tendensiyalardan biri – “boşanma partiləri” artıq Azərbaycanda da görünməyə başlayıb.
Belə ki, ailə həyatının başa çatmasını kədər və itki deyil, “yeni başlanğıc” kimi qeyd edən şəxslər boşanma münasibətilə dostları ilə məclis təşkil edir, hətta bu mərasimi sosial şəbəkələrdə paylaşırlar. Ənənəvi olaraq Azərbaycanda boşanma ailə üçün ciddi və emosional hadisə hesab olunur. Bu səbəbdən nikahın sona çatmasının şənlik, tort və xüsusi mərasimlə qeyd edilməsi cəmiyyətdə birmənalı qarşılanmır.
Deputat Azər Allahverənov Musavat.com-a qeyd edib ki, boşanmalarla bağlı yeni-yeni trendlər özünü büruzə verməkdədir: “Bir tərəfdən statistik göstəricilərin artdığını, digər tərəfdən isə bu prosesə münasibətdə yeni davranış modellərinin formalaşdığını görürük. Xüsusilə əvvəllər mühafizəkar cəmiyyətlərdə qəbul olunmayan bəzi yanaşmalar indi daha müasir davranış forması kimi ortaya çıxır. Onlardan biri boşanmanın xüsusi şəkildə qeyd edilməsi, hətta bununla bağlı əyləncə gecəsi və ya “boşanma partisi” təşkil olunmasıdır. Bu ənənə xarici ölkələrdə müəyyən qədər yayılıb. Azərbaycanda isə hələ geniş xarakter almasa da, xüsusilə sosial mediada belə nümunələrə rast gəlmək mümkündür”.
Onun fikrincə, psixoloji baxımdan belə bir tədbir tərəflərin yaşadığı gərginlikdən azad olması, yeni mərhələyə keçidi qəbul etməsi kimi izah edilə bilər: “Digər tərəfdən, bunu insanın öz həyatına dair sərbəst qərar verməsi və müstəqilliyini yenidən qazanması kimi qiymətləndirən yanaşmalar da mövcuddur. Ənənəvi Azərbaycan cəmiyyətində isə boşanma uzun müddət utancverici hadisə kimi qəbul olunub. Boşanan şəxslər, xüsusilə qadınlar, ictimai qınaq və müxtəlif stiqmalarla üzləşiblər. Belə hallarda ailənin gələcək taleyindən və həmin nikahda olan şəxslərin xoşbəxtliyindən daha çox, ətrafın və cəmiyyətin münasibəti ön plana çıxıb”.
Ölkədə “boşanma partisi”nə gəldikdə, deputat qeyd edib ki, burada müxtəlif situasiyalar mümkündür: “Bəzi hallarda keçmiş həyat yoldaşlarının hər ikisi belə tədbirdə iştirak edir və ayrıldıqlarını qarşılıqlı anlaşma şəraitində qeyd edirlər. Xüsusilə uşaqların olduğu ailələrdə tərəflərin münasibəti sivil şəkildə sonlandırması uşaqların psixoloji vəziyyətinə mümkün mənfi təsirlərin azaldılması baxımından əhəmiyyətli ola bilər. Başqa bir halda isə belə tədbiri yalnız tərəflərdən biri təşkil edir, digəri iştirak etmir. Bu zaman həmin şəxsin ayrılığı daha sakit və sivil şəkildə qəbul etdiyini nümayiş etdirmək istəməsi mümkündür. Digər tərəf isə bu qərarla razılaşmaya və ya tədbirə fərqli münasibət göstərə bilər. Ona görə də hər konkret hadisənin öz kontekstində qiymətləndirilməsi lazımdır”.
Onun sözlərinə görə, “boşanma partisi”ni birmənalı şəkildə yaxşı və ya pis hadisə kimi qiymətləndirməkdənsə, onun hansı şəraitdə və hansı məqsədlə keçirildiyinə diqqət yetirmək lazımdır: “Əgər bu, tərəflərin qarşılıqlı razılığı ilə, heç kəsi alçaltmadan və qarşıdurma yaratmadan ayrılığı qəbul etməsinin bir formasıdırsa, bunu yeni sosial davranış modeli kimi nəzərdən keçirmək mümkündür. Nəticə etibarilə, boşanmaya münasibətin dəyişməsi ailə institutunda baş verən daha geniş transformasiyanın bir hissəsidir. Bu prosesə sosioloji, psixoloji, hüquqi və demoqrafik aspektlərdən yanaşmaq mümkündür. Yeni davranış modellərinin formalaşması da məhz bu dəyişikliklərin fonunda meydana çıxır. Əsas olan isə boşanmanın özündən daha çox, tərəflərin ayrıldıqdan sonra bir-birinə və xüsusilə uşaqlara münasibətidir”.
