Tramp Zelenskidən Rusiya neft obyektlərinə hücumları azaltmağı istəyir. ABŞ prezidentinin Ukrayna tərəfinə Rusiya neft emalı zavodlarına zərbələri azaltmaq çağırışı etdiyi bildirilir. Ukrayna rəsmiləri isə belə bir razılaşmanın qarşılıqlı olması lazım olduğunu deyirlər. Sizcə Zelenski Trampın təklifini qəbul etməsə, nə baş verecek?
Mövzu ilə bağlı Gündəm24.az -a danışan politoloq Aydın Tağıyev maraqlı fikirlər səsləndirib. O, bildiribki, Donald Trampın Ukraynadan Rusiya neft obyektlərinə hücumları azaltmaq çağırışı əslində ABŞ-ın qlobal enerji bazarındakı maraqları ilə bağlıdır.
Rusiya neft emalı zavodlarına zərbələr dünya enerji qiymətlərini yüksəldə, bazarda qeyri-sabitlik yarada bilər. Tramp administrasiyası isə daxili iqtisadiyyata mənfi təsirləri minimuma endirmək istəyir.
Digər tərəfdən Zelenski və Ukrayna rəsmiləri bildirirlər ki, belə bir razılaşma yalnız qarşılıqlı ola bilər. Yəni, əgər Ukrayna hücumları azaldırsa, Rusiya da öz raket və dron zərbələrini dayandırmalıdır. Əks halda, hücumların azalması Ukraynanın müdafiə qabiliyyətini zəiflədər və Rusiyaya üstünlük qazandırar.
Fikrimcə, Zelenskinin Trampın təklifini qəbul etməməsi Ukraynanın müstəqil qərarvermə iradəsini göstərsə də, ABŞ-la münasibətlərdə müəyyən soyuqluq yarada bilər. Başqa aspektdən bu, həm də Qərbin birliyinə təsir edə bilər. Əslində, məsələ Ukraynanın təhlükəsizlik maraqları ilə ABŞ-ın iqtisadi maraqları arasında balansın necə qurulacağına bağlıdır.
Gündəm24.az
İlkin Şirinov
