Pakistanın Pəncab əyalətində 20 yaşlı Azərbaycan vətəndaşına qarşı törədilən kütləvi təcavüz böyük rezonansa səbəb olub.
Gündəm24.az Musavat.com-a istinadən xəbər verir ki, Pəncabın baş prokuroru Çaudhri İrfan Sadiq Tarrar təhqiqatın gedişatını şəxsi nəzarətinə götürüb.
20 yaşlı azərbaycanlı qadın biznes məqsədilə Pakistana gəlib və cümə günündən şənbəyə keçən gecə Rayvind yaxınlığındakı özəl yaşayış kompleksində kirayələdiyi mənzildə üç nəfərin təcavüzünə məruz qalıb.
“Defense C” polis bölməsində qeydə alınan hadisə xüsusi rezonans doğuran işlər siyahısına salınıb.
Pəncabın baş prokuroru müstəntiqi sentyabrın 30-da çağıraraq istintaq materiallarının tam dəsti ilə gəlməsini tələb edib. Baş prokuror təhqiqatın qanunvericiliyin bütün tələblərinə əməl olunmaqla, şəffaf və təxirəsalınmadan yekunlaşdırılması barədə göstəriş verib. O, həmçinin təqsirləndirilən şəxslərə qarşı qanuna uyğun və mövcud sübutlar əsasında sərt tədbirlərin görülməsini tapşırıb.
Bazar ertəsi polis Lahorda əcnəbi qadına qarşı dəstəvi təcavüz törətməkdə şübhəli bilinən üç nəfərdən birini həbs edib. Lahor polisinin general-inspektorunun müavini (təhqiqat üzrə) Zişan Rza “Dawn” nəşrinə bir şübhəlinin saxlanıldığını təsdiqləyib. O bildirib ki, digər iki şübhəlinin də şəxsiyyəti müəyyənləşdirilib və onların yaxalanması üçün reydlər keçirilir.
Bazar günü polis federal hakimiyyət orqanlarına müraciət edərək üç şübhəlinin adının Müvəqqəti Milli İdentifikasiya Siyahısına (PNIL) daxil edilməsini xahiş edib. Hüquq-mühafizə orqanlarının məlumatına görə, onlar hadisədən dərhal sonra Lahordan qaçıblar.
Polis, həmçinin şübhəlilərdən birinin iki yaxın qohumunu və ev xidmətçisini saxlayıb. Hadisə zamanı istifadə edildiyi ehtimal olunan avtomobil də müsadirə olunub.
Zərərçəkən qadın məhkəmə magistratı qarşısında ifadə vermək üçün gücləndirilmiş mühafizə altında məhkəməyə gətirilib. İclas başlamazdan əvvəl magistrat bütün kənar şəxslərin zalı tərk etməsi barədə sərəncam verib. Məhkəmə dinləmələri bir saatdan çox davam edib.
