“Qaça-qaça aşağı düşdük, hər yer tüstü içində idi”.
Gündəm24.az Teleqraf-a istinadən xəbər verir ki, bunu ötən gün Yasamalda yanğın baş vermiş binanın sakini Həmid Manafov deyib.
O qeyd edib ki, yanğın zamanı binanı böyük çətinliklə tərk edə biliblər:
“Həmin vaxt binada idik, işıqlar qəfil söndü, kənardan səs-küy eşitdik. Çölə çıxanda hər yeri tüstü bürüdüyünü gördük. Biz 6-cı mərtəbədə yaşayırıq, qaça-qaça aşağı düşdük. Güclə eşiyə çıxdıq. 12-ci mərtəbədən gələn tüstünü gördük, aşağı düşdükcə tüstü daha da çoxalırdı”.
Həmid Manafov bildirib ki, binadan çıxdıqdan sonra 11-ci mərtəbənin yandığını görüb.
Qeyd edək ki, ötən gün axşam saat 19:50 radələrində Yasamal rayonu, M.Seyidov küçəsi ərazisindəki yaşayış binasında yanğın baş verib.
Yanğın zamanı tüstüdən zəhərlənmə diaqnozu ilə 27 nəfər hospitalizasiya olunub, 20-nə (13-ü kişi, 7-si qadın) zəruri tibbi xidmətlər göstərilib, 3 nəfər həyatını itirib.
