Məlum olduğu kimi, paytaxtın bir çox yollarında pik saatlardan asılı olmayaraq tıxaclar müşahidə olunur. Artıq demək olar ki, həftənin bütün günləri və günün istənilən saatında sözügedən halla qarşılaşırıq. Bu səbəbdən dünya praktikasında geniş tətbiq olunan “reversiv yol” sisteminin Azərbaycana gətirilməsi təklif edilir. Bu, avtomobil yollarında hərəkət istiqamətinin sutkanın müəyyən vaxtlarında dəyişdirildiyi xüsusi zolağa deyilir.
Gündəm24.az Globalinfo.az-a istinadən xəbər verir ki, nəqliyyat məsələləri üzrə ekspert Rauf Ağamirzəyev deyib ki, tıxac olan küçələrdə məhz avtobus və velosiped zolaqlarının təşkilinin qısa zamanda yaradılması mümkün alternativlərdəndir:
“Tıxac dünən də var idi, bu gün də var. Amma fərq ondadır ki, dünənki tıxacda alternativ yox idi. Bu gün isə avtobus zolaqları şəbəkəsi və mikromobillik zolaqları hərəkət üçün real alternativ yaradır.
Reversiv rejimin tətbiqi bizə nə verəcək? Şəhərimizin küçə-yol şəbəkəsi məhduddur. Tutaq ki, şəhərə giriş istiqamətində hərəkət zolaqlarının sayını artırdıq, amma yenə də darboğaz şəhərin içində yaranır və daxilolma problemi qalır. Tıxacın azalması üçün ciddi alternativlər formalaşdırmaq lazımdır və bunu mərhələli şəkildə etmək vacibdir.
Bu gün ayrılmış avtobus zolağı və mikromobilik zolaq mövcuddursa, bununla paralel piyada infrastrukturu da sürətləndirilməlidir. Piyada səkiləri abadlaşdırılmalı, maneələr aradan qaldırılmalı, təhlükəsiz keçidlər – zebraya, işıqfor malik piyada keçidləri təmin olunmalıdır.
Rauf Ağamirzəyev
Növbəti mərhələ — relsli nəqliyyatın inkişafıdır. Bu, dövlət proqramında qeyd olunub və ilkin işlər artıq başlayıb. Gələcəkdə həm metroda, həm də dəmir yolunda daha aktiv tikinti işləri aparılacaq. İctimai nəqliyyat növlərinin inkişafı tıxaca birbaşa təsir edən əsas amildir. Çünki avtomobillə səfər edənlərin sayı azaldıqca, mövcud avtomobil istifadəçilərinin müəyyən qismi ictimai nəqliyyata yönəldikcə tıxacın səviyyəsi və davametmə müddəti əhəmiyyətli dərəcədə azalacaq”.
Ekspert deyib ki, insanlara müxtəlif hərəkət imkanları təqdim etmək lazımdır:
“Çünki fərdi avtomobillərin çoxalması həm ekoloji problemlər, həm səs-küy çirkliliyi, həm də şəhərin ən dəyərli resursu olan torpağın qeyri-səmərəli istifadəsi ilə nəticələnir. Daha səmərəli, eyni zamanda, çoxluğun hərəkətini təmin etməliyik.
Hazırda ölkədə mobilliyin transformasiyası baş verir. Yeni zolaq şəbəkəsinin yaradılması ilə yeni alternativlər formalaşır. İnfrastruktur layihələrinin əsas hədəfi də müəyyən qrup avtomobil istifadəçisini ictimai nəqliyyata yönəltməkdir.
Reversiv rejim isə hazırda real fayda vermir. Gələcəkdə, məsələn, Bakı dairəvi yolunun tam başa çatmasından sonra əgər aparılan təhlillər reversiv rejimin şəhərə giriş nöqtələrində effektiv olacağını göstərərsə, o zaman tətbiq edilə bilər. Sürücülər avtomobillərini kənarda park edib şəhər daxilində ictimai nəqliyyatdan istifadə edə bilərlər. Bu, gələcək üçün nəzərdən keçirilə biləcək variantdır”.
