Ulu Öndər Heydər Əliyevin anım günü Azərbaycan xalqı üçün təkcə kədər deyil, həm də qürur, milli birlik və dövlətçilik düşüncəsinin güclü təcəssümüdür. Heydər Əliyev Azərbaycan dövlətçiliyinin memarı, xalqın milli kimliyini qoruyan, onu parçalanmaqdan, itkilərdən, xaosdan xilas edib dünyaya çıxaran tarixi lider kimi daim xatırlanır. Onun həyatı və fəaliyyəti bir daha sübut edir ki, böyük liderlər zamanın fövqünə qalxaraq millətlərin taleyini dəyişdirirlər.
Heydər Əliyev müstəqil Azərbaycanın ideoloji, siyasi, iqtisadi və hərbi əsaslarını yaratmaqla xalqımızın gələcəyini təmin edən möhkəm təməl qoydu. Xalqın ağır sınaqlarla üzləşdiyi illərdə o, cəsarətli qərarları, qətiyyəti və uzaqgörənliyi ilə Azərbaycanı yenidən dirçəliş yoluna çıxardı. Dövlət idarəçiliyində prinsipiallıq, milli dəyərlərə bağlılıq və vətənə sədaqət onun bütün fəaliyyətinin əsasında dayanırdı.
Ulu Öndərin xüsusi önəm verdiyi məsələlərdən biri də Qərbi Azərbaycan həqiqətlərinin qorunması, xalqımızın tarixi yaddaşının saxlanılması və gələcək nəsillərə ötürülməsi idi. Heydər Əliyev dəfələrlə vurğulayırdı ki, Qərbi Azərbaycan xalqımızın tarixi torpağı, milli-mədəni irsinin ayrılmaz parçasıdır. O, Qərbi Azərbaycanlıların öz doğma yurdlarından deportasiya edilməsinin siyasi mahiyyətini dünyaya çatdırmaq üçün mühüm addımlar atmış, bu mövzunun dövlət səviyyəsində gündəmdə saxlanılmasını təmin etmişdi.
Bugün Qərbi Azərbaycan İcmasının apardığı mübarizə, informasiya fəaliyyəti və hüquqi əsaslara söykənən qayıdış konsepsiyası məhz Heydər Əliyevin yaratdığı ideoloji bazanın üzərində formalaşıb. Onun müəyyən etdiyi siyasi xətt bu gün həm Qərbi Azərbaycan İcması, həm də bütün xalq üçün yol göstərən strateji istiqamətdir. Ulu Öndərin “hər bir azərbaycanlı öz tarixi torpaqlarına qayıtmaq hüququna malikdir” fikri, əslində, Qərbi Azərbaycan həqiqətlərinin gələcəyini müəyyən edən əsas prinsipdir.
Heydər Əliyevin misilsiz dövlətçilik irsi bu gün də yaşayır, aktuallığını qoruyur və Azərbaycan dövlətinin inkişaf yolunda əvəzsiz rol oynayır. Onun xatirəsi xalqımız üçün əbədi dəyərdir, çünki Heydər Əliyev təkcə bir lider deyil, millətinin taleyini dəyişən tarixi şəxsiyyət, güc və əzm rəmzidir.
Bu gün Ulu Öndərin anım günü qeyd olunarkən həm onun Azərbaycan üçün gördüyü nəhəng işlər, həm də Qərbi Azərbaycan gerçəkliklərinə verdiyi xüsusi diqqət bir daha xatırlanır. Onun irsi yaşadıqca, xalqımızın milli yaddaşı, dövlətçilik ənənələri və tarixi torpaqlarımıza qayıdış arzusu da yaşayacaq.
Qərbi Azərbaycan İcması Sumqayıt Nümayəndəliyi
Ramiz İsmayılov
