Amerikalı aktyor Ceyms Renson vəfat edib.
Gündəm24.az lent.az-a istinadən bildirir ki, Los-Anceles dairəsinin məhkəmə-tibbi ekspertizasının məlumatına görə, serial və filmlərdə yaratdığı xarakterik rollarla milyonlarla tamaşaçının qəlbini qazanan Hollivud aktyoru dekabrın 19-da intihar edib. Ölüm səbəbi kimi onun Los-Ancelesdəki evində özünü asması göstərilib.
Hazırda ailənin rəsmi nümayəndələri və polis bütün detalları açıqlamır. Lakin aktyorun yaxın ətrafı onun uzun müddət depressiya ilə mübarizə apardığını bildirir.
Qeyd edək ki, Ceyms Renson 1979-cu il iyunun 2-də Merilend ştatının Baltimor şəhərində anadan olub. Karyerasına 2000-ci illərin əvvəllərində başlasa da, əsl uğuru “Dinləmə” serialındakı Ziqqi Sobotka rolu ilə qazanıb. Onun impulsiv və faciəvi obrazı serialın ikinci mövsümünün ən yaddaqalan personajlarından biri hesab olunur.
Daha sonra Renson İraq müharibəsinə həsr olunmuş “Qatil nəsil” (Generation Kill) mini-serialında Coş Rey Person rolunu canlandıraraq dramatik aktyor istedadını bir daha nümayiş etdirib.
Aktyor həmçinin “Sinister” və “Sinister 2” qorxu filmlərində şerif köməkçisi rolunda, eləcə də “O, 2-ci fəsil” filmində böyümüş Eddi Kaspbrak obrazı ilə milyonlarla tamaşaçı tərəfindən tanınıb. Birinci filmdəki uşaq aktyora olan zahiri oxşarlığı və emosional oyunu tənqidçilər tərəfindən yüksək qiymətləndirilib.
Son illərdə Ceyms Renson fəaliyyətini davam etdirərək “Qara telefon” (The Black Phone), “Yer uğrunda mübarizə” (Captive State) kimi layihələrdə yer alıb. Onun son işləri arasında “Qara telefon 2” filmi və “Pokerface” dramatik-komedik serialının ikinci mövsümü var.
Həmkarları sosial şəbəkələrdə başsağlığı paylaşaraq Ceyms Rensonu “son dərəcə həssas və dərin insan” kimi xatırlayırlar. Onların sözlərinə görə, o, çəkiliş meydançasında hər zaman xüsusi bir enerji ilə seçilirdi.
