Hər bir dövlətin qüdrəti yalnız onun iqtisadi və hərbi imkanları ilə deyil, həm də ölkə daxilində qanunun aliliyinin, ictimai sabitliyin və vətəndaş təhlükəsizliyinin etibarlı şəkildə təmin olunması ilə ölçülür. Bu ali missiyanın həyata keçirilməsində polis orqanlarının rolu xüsusi əhəmiyyət daşıyır. Azərbaycan Respublikasında da polis sistemi dövlətçiliyin mühüm dayaqlarından biri olmaqla, ictimai asayişin qorunması, cinayətkarlıqla mübarizə, insan və vətəndaş hüquqlarının müdafiəsi, konstitusiya quruluşunun təhlükəsizliyinin təmin edilməsi istiqamətində əvəzsiz xidmət göstərir.
Hər il 2 iyul tarixinin Azərbaycan Polisi Günü kimi qeyd olunması təsadüfi deyil. Bu tarix xalqımıza və dövlətimizə xidmət edən polis əməkdaşlarının peşəkarlığının, fədakarlığının və dövlətə sədaqətinin yüksək qiymətləndirilməsinin ifadəsidir.
Azərbaycan polisi ötən illər ərzində mürəkkəb və məsuliyyətli inkişaf yolu keçmişdir. Müstəqilliyin ilk illərində ölkədə hökm sürən siyasi qeyri-sabitlik, cinayətkarlığın artması və dövlət institutlarının zəifləməsi polis orqanlarının fəaliyyətini olduqca çətin şəraitdə həyata keçirməsini tələb edirdi. Məhz xalqın Ümummilli Lideri Heydər Əliyev tərəfindən hüquq-mühafizə orqanlarının yenidən formalaşdırılması və dövlət idarəçiliyinin möhkəmləndirilməsi istiqamətində həyata keçirilən ardıcıl islahatlar nəticəsində polis sistemi peşəkar və müasir hüquq-mühafizə institutuna çevrildi.
Bu gün cənab Prezident İlham Əliyev tərəfindən müəyyən edilən dövlət siyasəti çərçivəsində daxili təhlükəsizliyin təmin olunması, müasir texnologiyaların tətbiqi, rəqəmsal idarəetmənin inkişafı, vətəndaş məmnunluğunun artırılması və hüquq-mühafizə fəaliyyətinin beynəlxalq standartlara uyğunlaşdırılması istiqamətində mühüm işlər həyata keçirilir. Daxili İşlər Nazirliyində aparılan institusional islahatlar hüquq-mühafizə sisteminin çevikliyini və effektivliyini daha da artırmışdır.
Azərbaycan polisi yalnız cinayətlərin qarşısının alınması və açılması ilə kifayətlənmir. Polis əməkdaşları hər gün küçələrdə, yaşayış məntəqələrində, dövlət və strateji obyektlərdə, kütləvi tədbirlərdə, sərhədyanı ərazilərdə və fövqəladə hallarda insanların təhlükəsizliyinin təmin olunması üçün fasiləsiz xidmət aparırlar. Onların fəaliyyəti cəmiyyətin sabit inkişafı və vətəndaşların gündəlik təhlükəsiz həyatı üçün mühüm təminatdır.
Azərbaycan polisinin ən şərəfli səhifələrindən biri də Vətən müharibəsi dövründə yazılmışdır. Polis əməkdaşları ön və arxa cəbhədə üzərlərinə düşən vəzifələri yüksək peşəkarlıqla yerinə yetirmiş, azad olunmuş ərazilərdə hüquq qaydasının bərpasında, ictimai təhlükəsizliyin təmin edilməsində, minalardan təmizlənmə prosesinin mühafizəsində, strateji obyektlərin qorunmasında və dövlət idarəçiliyinin bərpasında mühüm rol oynamışlar. Bir çox polis əməkdaşları bu müqəddəs missiyanı yerinə yetirərkən şəhid olmuş, sağlamlıqlarını itirmişdir. Göstərdikləri qəhrəmanlıq və xidməti fəaliyyətə görə polis əməkdaşları dövlət tərəfindən yüksək orden və medallarla təltif olunmuşlar.
Müasir dövrdə cinayətkarlığın formaları da dəyişir. Kibercinayətlər, transmilli mütəşəkkil cinayətkarlıq, narkotik vasitələrin qanunsuz dövriyyəsi, insan alveri, terrorçuluq və digər təhlükələr hüquq-mühafizə orqanlarından yüksək peşəkarlıq, beynəlxalq əməkdaşlıq və müasir texnologiyalardan səmərəli istifadə tələb edir. Azərbaycan polisi bu çağırışlara uyğun fəaliyyət göstərərək ölkənin təhlükəsizlik sisteminin ayrılmaz hissəsinə çevrilmişdir.
Bu gün Azərbaycan Respublikasının Daxili İşlər Naziri Vilayət Eyvazov rəhbərliyi ilə daxili işlər orqanlarında xidmət intizamının möhkəmləndirilməsi, peşə hazırlığının yüksəldilməsi, maddi-texniki bazanın gücləndirilməsi, rəqəmsal idarəetmə sistemlərinin tətbiqi və vətəndaşlara göstərilən xidmətlərin təkmilləşdirilməsi istiqamətində ardıcıl işlər həyata keçirilir. Bu fəaliyyət hüquq-mühafizə sisteminin müasir tələblərə uyğun inkişafına və cəmiyyətin polisə olan etimadının daha da möhkəmlənməsinə xidmət edir.
Polis peşəsi yalnız vəzifə deyil, böyük məsuliyyət, cəsarət və fədakarlıq tələb edən şərəfli xidmətdir. Polis əməkdaşı hər gün öz həyatını riskə ataraq cəmiyyətin təhlükəsizliyi naminə xidmət edir. Bu xidmətin arxasında ailəsindən uzaq keçirilən gecələr, çətin əməliyyatlar, yüksək məsuliyyət və Vətənə sədaqət dayanır.
Azərbaycan polisi dövlətçiliyin keşiyində duran, qanunun aliliyini təmin edən və cəmiyyətin təhlükəsizliyinə xidmət edən mühüm dövlət institutudur. Güclü polis olmadan sabit dövlət, təhlükəsiz cəmiyyət və davamlı inkişaf mümkün deyil.
Azərbaycan Polisi Günü münasibətilə daxili işlər orqanlarının bütün əməkdaşlarını, veteranlarını və xidməti borcunu yerinə yetirərkən şəhid olmuş polis əməkdaşlarının ailələrini dərin hörmətlə təbrik edir, hər bir polis əməkdaşına möhkəm cansağlığı, məsuliyyətli xidmətində uğurlar və Vətənimiz naminə şərəfli fəaliyyət arzulayırıq.
Bayramınız mübarək, Azərbaycan Polisi!
Şaiq Mirzəyev
Vəkillər Kollegiyasının üzvü
Hüquq elmləri üzrə fəlsəfə doktoru
