Sosial şəbəkələrin həyatımızın ayrılmaz hissəsinə çevrilməsi ilə bloqerlik artıq sadəcə hobbi deyil, gəlirli peşəyə çevrilib.
Son illər Azərbaycanda da minlərlə izləyicisi olan influenserlər reklam əməkdaşlıqları, brend kampaniyaları və tərəfdaş proqramları vasitəsilə ciddi gəlirlər əldə edirlər.
Bəs ölkədə ən çox qazanan bloqerlər hansı sahələrdə fəaliyyət göstərirlər? Onların uğurunun arxasında hansı məzmun növləri dayanır?
Mütəxəssislərin fikrincə, bloqerlərin qazancı ilk növbədə auditoriyanın ölçüsündən, izləyicilərin aktivliyindən və reklam verənlərin marağından asılıdır. Azərbaycanda bir reklam paylaşımının qiyməti bəzi məşhur influenserlərdə minlərlə manata çata bilir.
Böyük auditoriyaya sahib blogerlər üçün bir reklam postunun dəyəri 3-10 min manat və daha yüksək ola bilir. Azərbaycanda ən çox qazanan blogerlərin böyük hissəsi həyat tərzi (lifestyle), əyləncə və gündəlik həyat mövzularında fəaliyyət göstərir. Bu sahədə çalışan influenserlər şəxsi həyatlarından, səyahətlərindən, alış-veriş təcrübələrindən və gündəlik fəaliyyətlərindən paylaşımlar edirlər. Məhz bu tip məzmun geniş auditoriya topladığı üçün reklam bazarının diqqətini daha çox cəlb edir.
Brendlər məhsullarını tanıtmaq üçün kütləvi auditoriyaya malik həyat tərzi blogerləri ilə əməkdaşlığa üstünlük verirlər. Moda, kosmetika və gözəllik sahəsində fəaliyyət göstərən influenserlər də ən yüksək qazanc əldə edənlər sırasındadır. Xüsusilə geyim markaları, kosmetik məhsullar, gözəllik salonları və onlayn alış-veriş platformaları bu kateqoriyadakı blogerlərlə mütəmadi əməkdaşlıq edir. Azərbaycanda milyonlarla izləyicisi olan bir sıra moda və gözəllik influenserlərinin reklam gəlirlərinin kifayət qədər yüksək olduğu bildirilir. Bu sahə həm qadın auditoriyasının çoxluğu, həm də reklam büdcələrinin böyük olması səbəbindən gəlir baxımından ön sıralarda yer alır. Son illərdə qida və kulinariya mövzularında fəaliyyət göstərən blogerlərin populyarlığı artıb. Restoranların, kafe və qida markalarının reklam kampaniyaları bu sahədə çalışan influenserlər üçün əlavə gəlir mənbəyi yaradıb.
Mütəxəssislər bildirirlər ki, yemək videoları və qısa resept paylaşımları sosial şəbəkələrdə yüksək baxış topladığı üçün reklam verənlər bu istiqamətə daha çox yatırım etməyə başlayıblar. Turizm şirkətləri, hotellər və aviaşirkətlərlə əməkdaşlıq edən səyahət bloqerləri də yüksək gəlir əldə edən influenserlər arasında yer alır. Xüsusilə yay mövsümündə xarici ölkələrdən hazırlanan videolar və turizm tövsiyələri böyük auditoriya cəlb edir. Bu sahədə çalışan blogerlər yalnız reklam gəliri deyil, həm də sponsorlu səfərlər və tərəfdaşlıq müqavilələri hesabına qazanc əldə edirlər.
Azərbaycanda son illərdə onlayn alış-veriş platformalarının populyarlaşması bloqerlərin gəlirlərini daha da artırıb. Xüsusilə müxtəlif marketpleyslər və e-ticarət şirkətləri ilə əməkdaşlıq edən influenserlər komissiya və reklam gəlirləri qazanırlar. Mediada yer alan məlumatlara görə, bəzi məşhur Azərbaycan bloqerlərinin yalnız bir onlayn alış-veriş platformasının reklamlarından aylıq on minlərlə manat gəlir əldə etdiyi bildirilir. Marketinq ekspertləri hesab edirlər ki, yaxın illərdə texnologiya, maliyyə savadlılığı, təhsil və süni intellekt mövzularında fəaliyyət göstərən niş blogerlərin də gəlirləri artacaq.
Reklam bazarı artıq yalnız böyük auditoriyaya deyil, müəyyən sahələr üzrə ixtisaslaşmış influenserlərə də maraq göstərməyə başlayıb. Beləliklə, hazırda Azərbaycanda ən çox qazanan blogerlər əsasən həyat tərzi, əyləncə, moda-gözəllik, yemək və səyahət sahələrində fəaliyyət göstərirlər. Lakin rəqəmsal bazarın inkişafı yeni mövzularda çalışan məzmun yaradıcıları üçün də böyük imkanlar vəd edir.//sfera.az
