Hazırda dünyanın bir nömrəli gündəm mövzusu hantavirusun yayılması ehtimalıdır. Bu virusun siçan və siçovullar vasitəsilə yayıldığı bildirilir. Bakıda, Sumqayıtda və digər şəhərlərdə bu kimi gəmiricilərin sayı çoxdur. Xüsusilə yaşayış binalarının zirzəmilərində siçovul problemi tez-tez müşahidə olunur.
Bu istiqamətdə Səhiyyə Nazirliyi hərəkətə keçməlidirmi? Gəmiricilərin məhv edilməsi və zərərsizləşdirilməsi ilə bağlı hansı tədbirlər görülməlidir?
Gündəm24.az xəbər verir ki, Globalinfo.az-a danışan tibb elmləri doktoru, professor Adil Qeybulla hantavirusların əsas təbii rezervuarı maral siçanları olduğunu bildirib.
“Bunu nəzərə almaq lazımdır ki, hantavirus əsasən maral siçanlarında müşahidə olunur. Bu gəmiricilər daha çox Şimali və Cənubi Amerikada yayılıb. Virusun məhz həmin ərazilərdən gəmilər və yük daşımaları vasitəsilə başqa yerlərə keçdiyi ehtimal edilir. Gəmilərdə gəmiricilərin sidiyi, tüpürcəyi və ekskrementləri ilə təmas nəticəsində yoluxma baş verə bilər. Bu təmas yataq dəstləri, qab-qacaq, qida məhsulları və digər əşyalar vasitəsilə də mümkündür”.
Professor qeyd edib ki, hantavirusun genişmiqyaslı pandemiya yaratmaq potensialı yoxdur:
“Əslində yoluxmalar daha çox lokal xarakter daşıyır. Virusun yoluxduruculuq indeksi yüksək deyil. İnsandan insana keçməsi isə yalnız Andes ştamında ehtimal olunur və bu da çox sıx təmas zamanı mümkündür. Bu baxımdan ciddi panikaya əsas yoxdur. Amma ehtiyatlı olmaq və profilaktik tədbirlərə diqqət yetirmək vacibdir. Çünki dünya hazırda intensiv miqrasiya və qlobal təmas dövrünü yaşayır”.
