Ölkədə mövsümi respirator xəstəliklərin artması fonunda COVID-19-un virusu yenidən gündəmə gəlib. TƏBİB-in Xəstəliklərin profilaktikası və kontrolu departamentinin müdiri Yaqut Qarayeva bildirib ki, hazırda ölkəmizdə koronavirusa yoluxanlar var.
Sitat: “Bütün respirator xəstəliklər necədirsə, COVID-19 da elədir. İndi mövsümdür və respirator xəstəliklər yayılıb”.
Hazırda COVID-19-un digər respirator xəstəliklərlə yanaşı mövsümi şəkildə artması nə dərəcədə təhlükəlidir? Əhali nəyə diqqət etməlidir?
Gündəm24.az Globalinfo.az-a istinadən xəbər verir ki, funksional tibb mütəxəssisi, terapevt Sevinc Musayeva deyib ki, hazırda koronavirusun digər respirator xəstəliklərlə paralel şəkildə artması mövsümi bir prosesdir və gözlənilən haldır:
“Lakin bu artım təhlükəli də ola bilər. Qrip, RSV, adenovirus kimi infeksiyalar eyni vaxtda aktivləşdiyi üçün xəstəlik daha sürətlə yayıla, xüsusilə də risk qruplarında ağırlaşmalara səbəb ola bilər. Bu gün müşahidə etdiyimiz COVID-19 ştammları ümumilikdə daha yüngül gedişlidir, amma bir neçə respirator virusun eyni anda dövr etməsi immun sistemi zəif olan insanlar üçün daha ciddi problem yaradır”.
Terapevt qeyd edib ki, əhali ehtiyat tədbirlərinə diqqət etməlidir:
“Qızdırma, öskürək, boğaz ağrısı, halsızlıq, dad-qoxu itkisi, baş ağrısı kimi əlamətlər olduqda insanlar özlərini izolyasiya etməli və həkimə müraciət etməlidirlər. Diabet, ürək-damar, astma, autoimmun xəstəlikləri və zəif immun sistemi olan şəxslər respirator infeksiyalara qarşı daha ehtiyatlı davranmalıdır. İctimai yerlərdə əl gigiyenasına əməl etmək, insan sıxlığında maskadan istifadə, tez-tez havalandırma aparmaq infeksiyanın yayılmasının qarşısını almağa kömək edir. Xəstəlik simptomları olan şəxslərin sosial təmasları məhdudlaşdırması həm özlərini, həm də ətrafdakıları qorumaq üçün vacibdir”.
