Sumqayıtda gənclər üçün yeni debat klubu yaradılıb.
Gündəm24.az xəbər verir ki, “Mindarena” azərbaycandilli debat klubu gənclərin məntiqi düşünmə, arqument qurma, sərbəst nitq və fərqli fikirlərə hörmətlə yanaşma bacarıqlarının inkişaf etdirilməsini qarşıya məqsəd qoyub.
Klubun ilk debat yarışı 13 sentyabr saat 10:00-da Heydər Əliyev Mərkəzində keçiriləcək.
Yarış klassik debat formatından fərqlənəcək. Hər komandada 3 iştirakçı olmaqla, püşkatma yolu ilə 2 əsas debat komandası müəyyənləşdiriləcək. Mövzu yarışdan əvvəl açıqlanacaq və komandalar strategiya hazırlamaq üçün 10 dəqiqə vaxt əldə edəcəklər.
Digər iştirakçılar isə “iştirakçı masaları” formatında çıxış edəcək. Onların ilkin mövqeləri müəyyənləşdiriləcək və əsas komandalar öz arqumentləri ilə mümkün qədər çox iştirakçını öz mövqelərinə inandırmağa çalışacaqlar.
Debat ilkin səsvermə, əsas debat, sual mərhələsi, ikinci debat və yekun səsvermədən ibarət olacaq. İştirakçılar debat zamanı komandaların çıxışlarından sonra mövqelərini dəyişə biləcəklər.
Tədbirdə qarşılıqlı hörmət əsas prinsip olacaq. Təhqir və vulgar ifadələrə, həmçinin dini və siyasi mövzulara yol verilməyəcək.
Mindarena-nın ilk yarışı ilə klubun fəaliyyətinə rəsmi start veriləcək.
Yarışa qatılmaq istəyən gənclər klubun səhifəsinə yaza bilərlər.
