Maliyyə üzrə ekspert Aleksey Mokrov ehtiyat kapitalının necə düzgün idarə olunmalı olduğunu açıqlayıb. O bildirib ki, yarımillik büdcəni evdə saxlamaq risklidir, kriptovalyutanı isə etibarlı maliyyə “təhlükəsizlik yastığı” hesab etmək olmaz.
Gündəm24.az xəbər verir ki, ekspertin sözlərinə görə, maliyyə yastığının həcmi məcburi xərclər – yaşayış, qida, dərman, nəqliyyat və kredit ödənişləri əsasında hesablanmalıdır.
Onun fikrincə, sabit gəliri olan şəxslər üçün 3-6 aylıq ehtiyat kifayət edir. Gəliri qeyri-sabit olan və ya ipoteka ödənişi olan şəxslərə isə 6-12 aylıq ehtiyat formalaşdırmaq tövsiyə edilir.
Mokrov qeyd edib ki, faiz dərəcələrinin dəyişməsi və inflyasiya fonunda bütün vəsaiti bir yerdə saxlamaq düzgün deyil.
“Vəsaitin bir hissəsi dərhal çıxış mümkün olan yığım hesabında, bir hissəsi qısamüddətli depozitdə, bir hissəsi isə nağd formada saxlanmalıdır. Maliyyə yastığı ən yüksək gəlir gətirən yox, ən dayanıqlı ehtiyat olmalıdır”, – deyə o bildirib.
Ekspert optimal bölgü kimi vəsaitin 20-30 faizinin təcili vəziyyətlər üçün əlçatan formada, 50-60 faizinin isə qısamüddətli əmanətlərdə saxlanmasını məsləhət görüb.
Onun sözlərinə görə, evdə yalnız 1-2 həftəlik xərcləri qarşılayacaq qədər nağd pul saxlamaq məqsədəuyğundur. Xarici valyutanın alınması isə yalnız gələcəkdə həmin valyutada planlaşdırılan xərclər olduqda məntiqli sayılır.
Kriptovalyutaya gəlincə, ekspert onu maliyyə ehtiyatının əsas hissəsinə çevirməməyi tövsiyə edib və yalnız bu sahədə təcrübəsi olan şəxslər üçün məhdud pay ayırmağın mümkün olduğunu vurğulayıb.\\publika.az
