İsveçdə qohum nikahları iyulun 1-dən etibarən rəsmi olaraq qadağan edilib. Yeni qanun qohum nikahlarından doğulan uşaqlarda genetik xəstəlik riskinin yüksək olması səbəbindən qəbul olunub.
Gündəm24.az xarici mediaya istinadən xəbər verir ki, İsveç parlamentinin qəbul etdiyi qanuna əsasən, bundan sonra yalnız ölkə daxilində deyil, digər dövlətlərdə bağlanmış qohum nikahları da ümumi qayda olaraq İsveçdə hüquqi baxımdan tanınmayacaq.
Hökumət bu addımla ailələrin qohum nikahı bağlamaq məqsədilə uşaqlarını xarici ölkələrə göndərməsinin qarşısını almağı hədəfləyir. Qanun iyulun 1-dən qüvvəyə minib.
Mütəxəssislər bildirirlər ki, qohum nikahları illərdir genetik risklər səbəbindən elmi müzakirələrin mövzusudur. Sağlam insanlar heç bir əlamət verməyən resessiv (gizli) xəstəlik genlərini daşıya bilərlər. Qohum olmayan şəxslər adətən fərqli gen mutasiyalarına sahib olduqları üçün eyni resessiv genin hər iki valideyndə rast gəlinməsi ehtimalı aşağı olur.
Lakin qohum nikahlarında cütlüyün eyni resessiv xəstəlik genini daşıma ehtimalı daha yüksəkdir. Hər iki valideyn eyni geni daşıyarsa həmin genetik xəstəliyin uşağa ötürülmə riski də əhəmiyyətli dərəcədə artır.
Mütəxəssislərin sözlərinə görə, bu cür nikahlardan doğulan uşaqlarda rast gəlinən genetik xəstəliklər cəmiyyət və bölgədən asılı olaraq dəyişir. Bununla belə, ən çox müşahidə olunan problemlər arasında anadangəlmə metabolik pozğunluqlar, talassemiya və oraqvari hüceyrəli anemiya kimi irsi qan xəstəlikləri, həmçinin beyin inkişafına təsir göstərən neyroinkişaf pozğunluqları yer alır.
Bu xəstəliklər uşaqlarda zehni inkişafın ləngiməsi, öyrənmə çətinlikləri və qıcolmalar kimi ciddi sağlamlıq problemlərinə səbəb ola bilər.//sfera.az
