Texnologiya portalı How-To Geek şirkətin tarixindəki ən yaxşı smartfonların siyahısını dərc edib.
Sfera.az xəbər verir ki, reytinq istifadəçi rəyləri və ekspertlərin şəxsi təəssüratları əsasında hazırlanıb. Maraqlıdır ki, siyahıda “Samsung”un ən yeni modellərinin əksəriyyəti yer almayıb.
Siyahının ilk pilləsində 2018-ci ildə təqdim olunan “Samsung Galaxy Note 9” qərarlaşıb. Müəlliflərin fikrincə, bu modeldə şirkət bütün vacib və innovativ funksiyaları uğurla bir araya gətirə bilib. Smartfon böyük AMOLED ekran, tutumlu batareya, ağıllı S-Pen qələmi, həmçinin gözün iris skaneri və ürək ritmi sensoru ilə seçilib.
İkinci yerdə 2013-cü ildə satışa çıxarılan “Samsung Galaxy S4” yer alıb. Bu model hələ də “Samsung” tarixinin ən çox satılan flaqman telefonu hesab olunur.
Üçüncü pillədə isə 2019-cu ildə təqdim edilən “Samsung Galaxy S10+” qərarlaşıb. Cihaz qeyri-adi ikili ekran kəsiyi, yenilənmiş dizaynı, yaddaş kartı dəstəyi və üç kameralı sistemi ilə yadda qalıb.
Siyahıya həmçinin 2016-cı ildə buraxılmış “Samsung Galaxy S7” və “Samsung Galaxy S7 Edge” modelləri də daxil edilib. Bu cihazlar əyri ekran kənarları ilə dövrünün digər smartfonlarından fərqlənirdi.
2025-ci ildə təqdim olunan “Samsung Galaxy S25+” isə kompakt ölçüləri və uzunmüddətli batareya performansına görə siyahıda yer alıb.
Bundan başqa, 2015-ci ildə təqdim edilən “Samsung Galaxy Note 5” modeli də böyük ekranı, keyfiyyətli kameraları və təkmilləşdirilmiş S-Pen qələmi ilə seçilərək reytinqə daxil edilib.
Qeyd edək ki, daha əvvəl “Samsung Electronics” şirkətinin yeni nəsil “iPhone” modelləri üçün OLED panellərinin istehsalına başladığı barədə məlumat yayılmışdı. Bildirilir ki, istehsal olunacaq təxminən 3 milyon ekran qatlana bilən cihazlarda istifadə ediləcək.
