Pedaqoji fəaliyyətlə məşğul olma qaydasına edilən son dəyişikliklər müəllimlərin işə qəbulu sistemində (MİQ) yeni perspektivlər açır. Dəyişikliklər fonunda əsas müzakirə mövzusu isə belədir: gələcəkdə ixtisasından asılı olmayaraq bütün ali təhsilli şəxslər müəllim kimi fəaliyyət göstərə biləcəkmi?
Mövzu ilə bağlı KONKRET.az-a açıqlama verən təhsil eksperti Ramin Nurəliyev bildirib ki, qaydalarda edilən yeniliklər artıq ictimaiyyətə təqdim olunub və bu istiqamətdə müəyyən yumşalmalar müşahidə edilir.
Ramin Nurəliyev
Ekspertin sözlərinə görə, hazırda pedaqoji ixtisaslarla yanaşı bəzi qeyri-pedaqoji ixtisas sahiblərinə də MİQ imtahanında iştirak etmək imkanı yaradılır və bu praktika əvvəlki illərdə də mövcud olub:
“Fərq ondan ibarətdir ki, hazırda filologiya, tarix və coğrafiya fənləri üzrə qeyri-pedaqoji ixtisasların MİQ imtahanında iştirakına icazə verilmir. Digər fənlər üzrə isə bu imkan saxlanılır. Elm və Təhsil Nazirliyi hər il əmək bazarındakı ehtiyaca uyğun qərar verir”.
Ramin Nurəliyev qeyd edib ki, bu yanaşmanın müsbət tərəfləri də var və beynəlxalq təcrübədə də sınaqdan keçirilib. Onun sözlərinə görə, xüsusilə yeni fənlərin tətbiqi bu ehtiyacı daha da aktuallaşdırır:
“Hazırda məktəblərdə süni intellekt dərslərinin tətbiqi müzakirə olunur. Bu dərsləri informatika müəllimlərinin tədris etməsi hər zaman mümkün olmaya bilər. Kompüter mühəndisliyi, kompüter elmləri və informasiya təhlükəsizliyi ixtisaslarını bitirən şəxslər bu sahədə daha uyğun namizədlərdir. Onlar MİQ imtahanında iştirak edib müəllim kimi fəaliyyətə başlaya bilərlər”.
Ekspert əlavə edib ki, bəzi fənlər üzrə müəllim çatışmazlığı da bu yanaşmanı zəruri edir. Məsələn, rəsm müəllimliyi sahəsində dizayn, rəngkarlıq və dekorativ-tətbiqi sənət ixtisaslarını bitirən şəxslərə müəllimlik imkanı verilməsi bu boşluğu doldurmağa kömək edir.
Onun fikrincə, kimya sahəsində də oxşar yanaşma tətbiq oluna bilər:
“Kimya mühəndisliyi ixtisasını bitirən şəxslər bəzən pedaqoji ixtisas məzunlarından daha güclü bilik bazasına malik olur. MİQ imtahanında həm ixtisas, həm də metodika üzrə sualların olması isə bu şəxslərin pedaqoji fəaliyyətə hazır olub-olmadığını müəyyən etməyə imkan verir”.
Ramin Nurəliyev hesab edir ki, imtahandan uğurla keçən və metodiki biliklərə yiyələnən şəxslərin müəllimlik fəaliyyətinə məhdudiyyət qoyulması məqsədəuyğun deyil.
Ekspert gələcəkdə filologiya, Azərbaycan dili və ədəbiyyat, tarix və coğrafiya fənləri üzrə də müəyyən qeyri-pedaqoji ixtisaslara icazə veriləcəyini istisna etməyib:
“Hazırda bu sahələrdə kadr çatışmazlığı yoxdur. Ona görə də ehtiyac duyulmur. Lakin gələcəkdə belə bir ehtiyac yaransa, bu istiqamətdə də qərarlar qəbul edilə bilər”.
Beləliklə, mövcud dəyişikliklər göstərir ki, müəllimlərin işə qəbulu sistemində daha çevik və ehtiyaca əsaslanan yanaşma formalaşır. Bu isə gələcəkdə müxtəlif ixtisas sahibləri üçün pedaqoji fəaliyyətə çıxış imkanlarının daha da genişlənə biləcəyini deməyə əsas verir.
