Böyük Britaniya hökuməti təhlükəsizlik vəziyyətinin pisləşməsi səbəbilə vətəndaşlarına 14 ölkə ilə bağlı təcili səyahət xəbərdarlığı edib.
Gündəm24.az xəbər verir ki, rəsmilər həmin bölgələrə səfər etməməyi və hazırda orada olan şəxslərin diqqətli davranmasını tövsiyə ediblər.
Xəbərdarlıq edilən ölkələr arasında İran, İsrail, Livan, Suriya, İraq və Yəmən kimi Yaxın Şərq ölkələri də yer alıb. Britaniya Xarici İşlər Nazirliyi bölgədə artan hərbi gərginlik və təhlükəsizlik risklərinə diqqət çəkib.
Məlumata görə, bəzi ölkələrdə terror təhlükəsi, silahlı qarşıdurmalar və raket hücumları ehtimalı səbəbilə xəbərdarlıq səviyyəsi yüksəldilib. Vətəndaşlara zəruri olmadığı halda bu bölgələrə səfər etməmək tövsiyə olunub.
Britaniya hökuməti həmçinin bölgədə olan şəxslərə yerli təhlükəsizlik qaydalarına əməl etməyi, izdihamlı yerlərdən uzaq durmağı və rəsmi xəbərdarlıqları izləməyi məsləhət görüb.
Mütəxəssislər hesab edirlər ki, Yaxın Şərqdə davam edən geosiyasi gərginlik yaxın aylarda beynəlxalq səyahətlərə və turizm sektoruna ciddi təsir göstərə bilər./musavat.com
