31 Dekabr – Dünya Azərbaycanlılarının Həmrəyliyi Günü və Yeni il bayramı ilə əlaqədar ölkədə bir həftəlik tətilin elan olunması hələ də ictimaiyyətin gündəmindədir. Müzakirələr əsasən bayram günlərinin ardıcıllığını təmin etmək məqsədilə aparılır.
Gündəm24.az Bizim.media-ya istinadən xəbər verir ki, əvvvəlcə mediada yayılan məlumatda 2025-ci ilin 29, 30, 31 dekabr və 2026-cı ilin 1, 2, 3, 4 yanvar tarixlərinin qeyri-iş günü olacağı bildirildi. Belə ki, iş və istirahət günlərinin ardıcıllığını təmin etmək məqsədilə 2025-ci ilin 29 və 30 dekabr iş günləri 27 və 28 dekabr şənbə-bazar günləri ilə əvəz ediləcək. Nəticədə ölkədə 29 dekabrdan 5 yanvar 2026-cı ilədək bayram tətili yaranacaq.
Lakin Nazirlər Kabineti mediada yayılan xəbərlərə rəsmi açıqlama verərək vurğuladı ki, hələlik belə bir qərar qəbul edilməyib. Rəsmi qərarın verilməsi üçün yekun razılıq gözlənilir.
Qeyd edək ki, əvvəlki illərdə bəzi bayram günlərinin daha əlverişli şəkildə tənzimlənməsi məqsədilə iş və istirahət günlərinin yerdəyişməsi halları müşahidə olunub. Lakin Dünya Azərbaycanlılarının Həmrəyliyi Günü və Yeni il bayramı ilə əlaqədar əvvəllər belə bir yerdəyişmə edilməyib. Məsələn, 2024-cü ilin dekabr-yanvar dövründə 30 dekabr və 3 yanvar iş günü kimi saxlanılıb və qeyri-iş günləri yalnız 30 dekabr, 1 və 2 yanvar tarixləri üçün elan olunub.
Bir sözlə, əvvəlki illərin təcrübəsinə əsaslanaraq belə nəticəyə gəlmək olar ki, bu il də 29 və 30 dekabr rəsmi iş günü, 31 dekabr və 1–4 yanvar tarixləri isə qeyri-iş günü kimi qeyd olunacaq. Beləliklə yeni il bayramı ilə əlaqədar istirahət günlərinin sayı – 5 gün olacaq.
İstənilən halda bu məsələnin cavabı Nazirlər Kabinetinin rəsmi qərarından asılı olacaq.
