Rusiyanın paytaxtı Moskvada yerləşən Vnukovo Beynəlxalq Hava Limanında uçuşların qəbulu və yola salınması müvəqqəti olaraq dayandırılıb.
Ajans.az xarici mediaya istinadən xəbər verir ki, hava limanında məhdudiyyətlər iyunun 17-si səhər saatlarında tətbiq edilib. Bu barədə Federal Hava Nəqliyyatı Agentliyi (Rosaviasiya) məlumat yayıb.
Bildirilir ki, Moskva vaxtı ilə saat 02:05-dən etibarən hava limanı qismən fəaliyyət göstərib və bəzi reyslər xüsusi razılaşdırılmış qaydada həyata keçirilib. Lakin saat 10:22-dən etibarən bütün uçuşların qəbulu və yola salınmasına tam məhdudiyyət qoyulub.
Məhdudiyyətlərin tətbiq edilməsinin səbəbi barədə rəsmi məlumat verilməyib. Sərnişinlərə uçuşlarla bağlı ən son məlumatları aviaşirkətlərdən və hava limanının rəsmi mənbələrindən dəqiqləşdirmək tövsiyə olunur.
