İran Xarici İşlər Nazirliyinin (XİN) mətbuat katibi İsmayıl Bəqayi Hörmüz boğazının idarəedilməsinin sahilyanı ölkələrə məxsus olduğunu bildirərək, buradan keçən gəmilərdən hər hansı rüsum və ya ödənişin alınmasının nəzərdə tutulmadığını bəyan edib.
Sfera.az xarici mediaya istinadən xəbər verir ki, Hörmüz boğazı ilə bağlı yayılan iddialara aydınlıq gətirən İran XİN rəsmisi boğazdan keçidlərin ödənişli olacağı barədə xəbərləri təkzib edib. O, gəmilərə göstəriləcək müəyyən xidmətlərin texniki xərclərinin ola biləcəyini, lakin bunun qətiyyən “keçid haqqı” (rüsum) kimi qiymətləndirilməməli olduğunu vurğulayıb.
ABŞ ilə aparılan danışıqlara toxunan iranlı diplomat bir çox məsələdə ümumi çərçivənin formalaşdığını, lakin bunun “müqavilənin imzalanması an məsələsidir” mənasına gəlmədiyini qeyd edib. Sözçü onu da əlavə edib ki, regional gərginliyin tamamilə azaldılması üçün Livan da daxil olmaqla, bütün cəbhələrdə hərbi əməliyyatların dayandırılması masadakı mümkün razılaşmanın əsas şərtlərindən biridir.
